Փաստ ինֆո

2012թ. աշնանային զորակոչի ընթացքում մոտ 100 նորակոչիկի մոտ եղել է հետպատվաստումային ռեակցիա: Այդ մասին այսօր հայտարարեց զորակոչված և հոսպիտալում մահացած նորակոչիկ Նորայր Սահակյանի գործով դատակոչված վկա,  Ստեփանակերտի զինվորական հոսպիտալի թերապեւտիկ բաժանմունքի պետ  Էդուարդ Արզումանյանը:

Վկան, ով այդ ժամանակ հանդիսացել է զորակոչային հանձնաժողովի բժիշկ թերապեւտ, դատարանում հայտնեց, թե պատվաստումից հետո նորակոչիկի ջերմելու մասին տեղեկանալուց անմիջապես հետո զննել է նրան, ջերմիջեցնող տվել, ապա՝ ուղարկել հոսպիտալ:

Ըստ նրա, զինվորի վիճակն այնպիսին չի եղել, որ անհրաժեշտ լիներ նրան տեղափոխել ոչ թե հոսպիտալ, այլ նեղ մասնագիտական հիվանդանոց:

Տուժողի իրավահաջորդ ճանաչված մահացած զինծառայողի հորը զայրացրեց վկայի խոսքերը՝ հայտարարելով. «ի՞նչ վիճակ պետք է լիներ, որ տեղափոխեիք, մահանար նոր»:

Հաջորդ վկան՝ «Իվանյանի» անվան հոսպիտալի բուժքույր Անահիտ Գրիգորյանը, ով դեպքի օրը եղել է հոսպիտալում ինֆեկցիոն  բաժանմունքի  հերթապահ քույր, դատարանին հայտնեց, որ բժշկի ախտորոշումից և նշանակումներից հետո ինքը ջերմիջեցնող է տվել նորակոչիկին, կաթիլային միացրել, որից որոշ ժամանակ անց տղայի ջերմությունը իջել է:
Վկան հայտնեց նաև, որ այդ օրը երկու նորակոչիկ են եղել նույն ախտորոշմամբ:

Նա վստահերցրեց, թե երեկոյան համայցի ժամանակ նորակոչիկներից ոչ ոք բողոք չի ունեցել, սակայն կեսգիշերին մոտ, երբ ինքը նորակոչիկ Նորայր Սահակյանին քնից արթնացրել է, որ նրան դեղորայք տա, ջերմությունը չափի, վերջինս ասել է,  որ սրտխառնոց ունի, զարկերակային ճնշումը չափելուց հետո, երբ պարզվել է, որ այն ցածր է նորակոչիկին տեղափոխել են վերակենդանանցման բաժանմունք:

Ի պատասխան հարցին էլ,  թե բժշկի նշանակումները բավարար են եղել, բուժքույրն ասաց, որ իրավունք չունի ասելու բավարար են, թե ոչ:

Հաջորդ դատական նիստը տեղի կունենա դեկտեմբերի 9-ին: