Փաստ ինֆո

Երևանի դիզվառելիքով աշխատող ավտոբուսներն այսուհետև կաշխատեն գազով: Այս մասին այսօր հանրությանը հայտնի դարձավ կառավարության նիստում ընդունված որոշումներից մեկից:

Որոշման համաձայն՝ Երևանի քաղաքապետարանին Չինաստանի կառավարության կողմից որպես նվիրաբերություն Հայաստանին տրամադրված դիզելային վառելանյութով աշխատող ավտոբուսների շարժիչները պետք է փոխարինվեն սեղմված բնական գազով աշխատող շարժիչներով: Ընդ որում, դրա արդյունքում, նախագծի հեղինակների համոզմամբ, «էապես կբարելավվի «Երևանի ավտոբուս» ՓԲԸ-ի ֆինանսական վիճակը»:

Հետաքրքրական է, որ որոշումը վերաբերում է բացառապես շարժիչների փոխարինմանը, իսկ գազով ավտոբուսներ շահագործելու տեխնիկական հարցերի մասին դրանում ոչ մի խոսք չկա: Այդ հարցը չշոշոփվեց նաև նիստի ընթացքում:

Տարածքային կառավարման նախարարի տեղակալ և ժամանակավոր պաշտոնակատար Վաչե Տերտերյանը զեկուցեց, որ նախատեսվում է Երևանում շահագործվող 73 ավտոբուսների՝ դիզելային վառելիքով աշխատող շարժիչները փոխարինել գազով աշխատող շարժիչներով:

Իսկ դրանց մաքսազերծման համար անհրաժեշտ է պետական բյուջեի պահուստային ֆոնդից տրամադրել 142մլն դրամ: Ստացվում է, որ քաղաքային ավտոբուսները գազով շահագործելու հարցն արդեն իսկ որոշված է, շարժիչներն էլ արդեն գնվել են, մնում է դրանք մաքսազերծել:

Այսպիսով, զիջելով քաղաքային տարնսպորտի սակագինը չբարձրացնելու հասարակական պահանջին, կառավարությունը որոշել է էժանացնել ծախսը` անվտանգության հաշվին: Եվ դա այն դեպքում, երբ Գյումրիի ճանապարհին տեղի ունեցած սարսափելի վթարից ընդամենը 1 ամիս է անցել:

Ի դեպ, որոշման նախագծում կառավարությունը չի էլ թաքցնում, որ այս ամենի նպատակը բացառապես ֆինանսական է:

«Փորձը ցույց է տվել, որ Երևան քաղաքում դիզելային շարժիչներով շահագործումը տնտեսապես արդյունավետ չէ՝ կապված դիզելային վառելիքի գնի, ինչպես նաև Երևան քաղաքի ռելիեֆով պայմանավորված դիզելային վառելիքի ծախսը ավել լինելու հետ»,- ասված է նախագծի հիմնավորման մեջ: