Փաստ ինֆո

2015թ-ի հունվարի 1-ից հիմնական աշխատանքային կենսաթոշակի չափը, իսկ հուլիսի 1-ից զինվորական հիմնական կենսաթոշակինը սահմանվում է 16 հազար դրամ՝ ներկայիս 14 հազար դրամի փոխարեն:

Այս մասին Ազգային ժողովի արտահերթ նիստում հայտնեց ՀՀ աշխատանքի և սոցիալական հարցերի նախարար Արտեմ Ասատրյանը՝ ներկայացնելով «Պետական կենսաթոշակների մասին», «Պետական պաշտոններ զբաղեցրած անձանց սոցիալական երաշխիքների մասին» «Զինծառայողների և նրանց ընտանիքների անդամների սոցիալական ապահովության մասին» օրենքներում փոփոխությունների և լրացումների օրենսդրական փաթեթը:

«Պետական պաշտոններ զբաղեցրած անձանց սոցիալական երաշխիքների մասին» օրենքում լրացում և փոփոխություններ կատարելու մասին օրինագծով կառավարությունը, մասնավորապես, առաջարկում է ամրագրել, որ պետական պաշտոն զբաղեցրած անձը կենսաթոշակի իրավունք ունի, եթե չի աշխատում, այն է՝ չի զբաղեցնում  պետական և համայնքային պաշտոն, կամ չի կատարում վճարովի այլ աշխատանք, բացի գիտական, մանկավարժական և ստեղծագործական աշխատանքից, որպես անհատ ձեռնարկատեր չի զբաղվում ձեռնարկատիրական գործունեությամբ, չի զբաղեցնում  նոտարի պաշտոն:

Ըստ ՀՅԴ խմբակցության անդամ Արծվիկ Մինասյանի, ամրագրումը, որ պետական պաշտոն զբաղեցրած անձը կենսաթոշակի իրավունք ունի, եթե չի աշխատում, լրացուցիչ սահմանափակում է:

Նախարարը չհամաձայնեց՝ ընդգծելով, որ սա պարզապես լրացուցիչ հստակեցում է, «քանի որ այսօր այդ նույն դրույթը, եթե ընդունենք որպես սահմանափակում, գործում է, այլ ձևաչափով է գործող օրենքում ամրագրված»: