Փաստ ինֆո

Հայկ Կյուրեղյանի նկատմամբ բռնությունների վերաբերյալ գործը Հատուկ քննչական ծառայության կողմից կարճելու որոշման դեմ վերջինիս ներկայացուցիչ, փաստաբան Երվանդ Վարոսյանի բողոքը դատախազը մերժել է: Ինչպես «Փաստինֆո»-ի թղթակցին հայտնեց Ե.Վարոսյանը, որոշումը ստանալու օրվանից սկսած օրենքով սահմանված մեկամսյա ժամկետում այն կբողոքարկվի  դատարան:  

ՀՀ քրեական օրենսգրքի 309-րդ հոդվածի 2-րդ մասի հատկանիշներով` բռնություն գործադրմամբ պաշտոնեական լիազորություններն անցնելու դեպքի առթիվ հարուցված քրեական գործի շրջանակում Հայկ Կյուրեղյանը տուժող էր ճանաչվել, ապա, ըստ Երվանդ Վարոսյանի, սմբողջությամբ ոստիկանների ցուցմունքների վրա հիմնվելով՝ ՀՔԾ-ն քրեական գործի կարճումը պատճառաբանել է, որ քննությամբ չեն կարողացել ապացուցել, որ Կյուրեղյանի նկատմամբ ոստիկանների կողմից բռնություններ են գործադրվել:

Հայկ Կյուրեղյանը, ի դեպ, հստակ ճանաչել է ոստիկաններից մեկին, իսկ մյուսների վերաբերյալ նշել է, որ եթե նրանք եղել են իրեն ոստիկանության բաժին տեղափոխող ավտոմեքենայի մեջ, ապա նրանք բոլորն էլ, բացի վարորդից, իրեն ծեծել են:

Ավելի վաղ «Փաստինֆո»-ի հետ զրույցում Երվանդ Վարոսյանը քննչական մարմնի կողմից գործը կարճելու այս որոշումը գնահատել էր որպես «ակնհայտ անհիմն, սակայն ՀՔԾ-ի ոգով կայացված, միանգամայն սպասելի որոշում»:

Հիշեցնենք, որ Հ.Կյուրեղյանն իր նկատմամբ կիրառված բռնությունների վերաբերյալ դիմում էր ներկայացրել Հատուկ քննչական ծառայություն:

Ըստ Հայկ Կյուրեղյանի հաղորդման` 2014թ. հունիսի 12-ին (Շանթ Հարությունյանի և մյուսների գործով առաջին դատական նիստի օրը) Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի շենքի դիմաց օդամղիչ ատրճանակով կրակելուց հետո ոստիկանության աշխատակիցներն իրեն բերման ենթարկելիս, ապա բաժնի վարչական շենքում իր նկատմամբ բռնություն են գործադրել` պատճառելով մարմնական վնասվածքներ:

Լուսանկարը՝ Ֆոտոլուրի