Փաստ ինֆո

Ազգային ժողովի ոչ իշխանական չորս ուժերի 12 կետերից բաղկացած պահանջների վերաբերյալ ՀՀ վարչապետի առաջարկի քննարկման նպատակով Ազգային ժողովի նախագահ Գալուստ Սահակյանի մոտ հրավիրված խորհրդակցության ժամանակ խմբակցությունների ներկայացուցիչներն ընդհանուր հայտարարի չեն եկել:

Կառավարությունը ներկայացնում էր ՀՀ կառավարության աշխատակազմի ղեկավար-նախարար Դավիթ Հարությունյանը:

Ինչպես ավելի վաղ տեղեկացրել ենք, ՀՀ վարչապետ Հովիկ Աբրահամյանն այսօր հանդես է եկել հայտարարությամբ՝ նշելով, թե եռյակի կողմից ներկայացված 12 կետերից շատերը նոր չեն. դրանց կառավարությունը հրապարակայնորեն անդրադարձել կամ իրականացրել է: «Այդուհանդերձ, մեր դիրքորոշումները քարացած չեն, և մենք պատրաստ ենք քննարկումների: Առաջարկում եմ յուրաքանչյուր հարցի համար կառավարության և ընդդիմության կողմից նշանակել 3 հոգանոց թիմ՝ յուրաքանչյուր կետի շուրջ փաստարկների վրա հիմնված դիրքորոշում ներկայացնելու նպատակով: Ես ակնկալում եմ, որ ընդդիմությունը ևս կառուցողական կմոտենա համագործակցության մեր առաջարկին»,-ասված է ՀՀ վարչապետի հայտարարության մեջ:

Ի դեպ՝ խորհրդակցությանը մասնակցել են բոլոր խմբակցությունների, բացառությամբ «Հայ ազգային կոնգրես»-ի, ներկայացուցիչները:

Եռյակի մաս կազմող մյուս երկուսի՝ «Բարգավաճ Հայաստան»-ի և «Ժառանգության» ներկայացուցիչները հեռացել են հանդիպումից: Նրանք առաջարկել են, որպեսզի վստահության վերականգման նպատակով կառավարության կողմից քայլ արվի, մասնավորապես, քննարկվի ԸՕ-ի բարեփոխման հարցը, ինչին կառավարության ներկայացուցիչը հակադարձել է, թե այդ հարցը նույն 12 կետերից բաղկացած փաթեթի մեջ է, որն իրենք համաձայնել են քննարկել:

ՀՀԿ խմբակցության ղեկավար Վահրամ Բաղդասարյանը հանդիպումից հետո լրագրողներին հայտնեց, թե որոշում չի կայացվել ընդդիմության ոչ կառուցողական պահվածքի պատճառով:

ԱԺ ոչ իշխանական ուժերի ներկայացուցիչներն էլ համատեղ որոշում չկայացնելը պատճառաբանեցին դիրքորոշումների տարբերությամբ: ՕԵԿ-ի ներկայացուցիչը լրագրողներին հայտնեց, որ խմբակցությունում դեռ պետք է քննարկեն, որից հետո միայն արդյունքների մասին կտեղեկացնեն:

ՀՅԴ խմբակցության ղեկավար Արմեն Ռուստամյանը՝ ի պատասխան լրագրողների հարցի, նշեց, որ ՀՅԴ-ի մոտեցումը հետևյալն է. իրենք համատեղ աշխատելու խնդիր չունեն: «12 կետերի իրականացման հեռանկարի հետ կապված ցանկացած մոտեցումներ էլ կարող ենք քննարկել և փորձել դա դարձնել իրական ծրագիր, որովհետև մեր խնդիրն այդ կետերի կատարումն է: Անտրամաբանական կլինի, եթե դու մի հարց բարձրացրել ես ու քեզ առաջարկում են նպաստել դրա լուծմանը, դու հրաժարվես»,-ասաց նա:           

ԱԺ փոխնախագահ Էդուարդ Շարմազանովն էլ լրագրողների հետ զրույցում նշեց, թե երկխոսությունը նրա համար է, որ իշխանությունն ու ընդդիմությունը մոտեցնեն իրենց դիրքորոշումները հասարակության համար կարևոր խնդիրների շուրջ: Ըստ նրա՝ «եթե ուլտիմատումներ ես ներկայացնում, նեղացածի կերպար ընդունում, ապա դա մարգինալության նշան է»:

«Այս քայլով կառավարությունն ու իշխանությունը ևս մեկ անգամ պատրաստակամություն են հայտնում նստել, քննարկել, գտնել ընդհանուր եզրեր: Սա չի նշանակում, որ 12 կետերն էլ միանգամից պետք է կատարվեն կամ չկատարվեն, քաղաքականությունը կլոր սեղանի տրամաբանություն ունի»,-ընդգծեց նա: