Փաստ ինֆո

«Իհարկե  քաղաքական դաշտը սիրում է PR, բայց PR-ով պետություն չեն պահում: Դու ինքդ քո հեղինակությունը, քո աշխատանքները պետք է այնպես տանես, որպեսզի հասնես նպատակին, իսկ մենք նպատակը թողնում ենք շատ հաճախ, մտածում ենք՝ այն գործիքները, որոնք կան, չեն բավարարում, եկեք խեղդենք, նոր գործիքներ վերցնենք, որպեսզի ասենք` ժողովո՛ւրդ, մենք ամենալավն ենք, ամենաբարին ենք»,- այսօր ԱԺ-ում՝ սահմանամերձ համայնքներում հարկային արտոնություններ տրամադրելու և սոցիալական աջակցության  մասին օրենքների նախագծերի քննարկման ժամանակ, հայտարարեց ԱԺ նախագահ Գալուստ Սահակյանը` դիմելով ընդդիմությանը:

ԱԺ նախագահը հիշեցրեց, որ ներկայիս ընդդիմության մեծ մասը նախկինում իշխանություն է եղել: «Ըստ երևույթին, ժամանակին իշխանության մեջ ամեն մեկը կարողացել է մի կտոր տանել, դրանով կարողացել է իր իմիջը բարձրացնել և այսօր գաղտնիքներ գիտի, անընդհատ, յուրաքանչյուր հարցից հետո խոսում են կոռուպցիայի մասին: Իհարկե, երկրում կոռուպցիա կա, բայց այդ կոռուպցիայի տեղերը այնպես մասնագիտորեն են նշում, որ մտածում ես ակամայից` եթե փորձ չունես, որտեղից ես կարողացել այդքան բանը ներառել քեզ մեջ»,- ասաց Գալուստ Սահակյանը:

Բանն այն է, որ կառավարության ներկայացրած անհետաձգելի ճանաչված օրենքների նախագծերի և հատկապես` սահմանամերձ համայնքներում գործարարներին հարկային արտոնություններ տրամադրելու մասին օրենքի նախագծի քննարկման ընթացքում այսօր ԱԺ-ում բազմիցս շոշափվեց դրա հնարավոր կոռուպցիոն ռիսկերի հարցը:

Ի դեպ, ԱԺ նախագահը նաև առաջարկեց ԱԺ դահլիճից հանել խոսափողերը, քանի որ, իր կարծիքով, իշխանությունների և ընդդիմության լավ հարաբերություններին հենց դրանք են խանգարում: «Դահլիճից դուրս բոլորն իրար հետ մոտ են, հարազատ են, մոտենում են, նստում են, վեր են կենում, վերլուծում են, մեկը մյուսին, ինչպես ժողովուրդն է ասում, թասիբն են պահում: Միկրոֆոնները խանգարում են մեզ, եթե կորոշեք, խոսափողները հանենք, եթե էդպես ավելի լավ կաշխատենք, էդպես անենք»,- առաջարկեց Գալուստ Սահակյանը:

Իսկ ելույթի ավարտին ԱԺ նախագահը հույս հայտնեց, որ խորհրդարանը կողմ կքվեարկի կառավարության նախաձեռնություններին, և դա կլինի «այն համաձայնությունը, որն ընդդիմությունն անընդհատ պահանջում է մեզանից»: