Փաստ ինֆո

Ազգային ժողովն արտահերթ նիստում քննարկում է կառավարության ներկայացրած  «Սահմանամերձ համայնքների սոցիալական աջակցության մասին» օրինագիծը:

Խորհրդարանական ուժերի ներկայացուցիչներն իրենց ելույթներում որոշ կետերի հետ անհամաձայնություն հայտնելով հանդերձ, նշում են, որ ընդհանուր առմամբ կողմ են նախագծին:

Հիշեցնենք, կառավարությունն այս օրենսդրական նախաձեռնությունը 2 օր առաջ էր անհետաձգելի կարգով ներկայացրել խորհրդարան` այն պատճառաբանությամբ, որ օրենքը ընդունվի և ուժի մեջ մտնի արդեն 2015թ-ի հունվարի 1-ից:

Օրինագիծը ներկայացնող տարածքային կառավարման փոխնախարար Վաչե Տերտերյանը  հայտնեց, որ օրենքի նախագծով նախատեսվում է սահմանամերձ համայնքի բնակիչների սպառած բնական գազի, էլեկտրաէներգիայի և ոռոգման ջրի վարձավճարները, սահմանամերձ համայնքի տարածքում ունեցած հողերի հողի հարկը և անշարժ գույքի գույքահարկը մասամբ փոխհատուցել ՀՀ պետբյուջեի միջոցներից: Իսկ թե ի՞նչ չափով և ի՞նչ կարգով կկատարվեն փոխհատուցումները, պատգամավորների հարցերին ի պատասխան, զեկուցողը նշեց, որ փոխհատուցման կարգն ու չափը կառավարությունը կորոշի տարվա ընթացքում` միջինացված սպառումների հաշվարկներից ելնելով:

Նշենք, որ փոխհատուցման ենթակա սահմանամերձ  համայնքների թիվը կառավարության ներկայացրած ցուցակում 31-ն է:

Օրենքի նախագիծը նաև նախատեսում է ադրբեջանական զինված ուժերի գործողությունների հետևանքով օթևանից զրկված սահմանամերձ համայնքների բնակիչներին մեկամսյա ժամկետում նույն համայնքի տարածքում ապահովել համարժեք օթևանով, սահմանամերձ համայնքներում և դրանց հարակից տարածքներում ականի պայթյունից, ադրբեջանական զինված ուժերի գործողությունների հետևանքով վիրավորված ՀՀ քաղաքացիների բուժումն իրականացնել պետպատվերի շրջանակում: Իսկ զոհված քաղաքացիների ընտանիքներին ՀՀ պետբյուջեից կտրվի միանվագ օգնություն՝ կառավարության սահմանած կարգով՝ հուղարկավորության և գերեզմանի բարեկարգման, տապանաքարի պատրաստման և տեղադրման ծախսերի համար:

ԱԺ «Հայ ազգային կոնգրես» խմբակցության անդամ Նիկոլ Փաշինյանն առաջարկեց սահմանամերձ համայնքներն ընդգրկել նաև ՀՀ-ում իրականացվող՝ դպրոցական երեխաներին սննդով ապահովելու ծրագրում, որպեսզի սահմանամերձ համայնքների դպրոցական երեխաներն էլ անվճար սնունդ ստանան:

Վաչե Տերտերյանը խոստացավ առաջարկը փոխանցել կառավարությանն ու քննարկել:

Նշենք, որ օրենքն ուժի մեջ է մտնում 2015թ. հունվարի 1-ից և գործելու է  առայժմ 3 տարի ժամկետով` մինչև 2018թ. հունվարի 1-ը: