Փաստ ինֆո

«Խնդիրն այսօր այն չէ, որ լինի հայտարարություն, այլ պետք է խոսքից անցնել գործողությունների: Կարող էր արձագանքել միայն ու միայն ԵԱՀԿ ՄԽ համանախագահների ինստիտուտը, բայց դրանից հետո նստեին ուղղաթիռները, գային, գնային այդ նույն տեղը, փորձեին դիակները բերեին, ուղղաթիռի մասերը բերեին, կազմակերպեին հետաքննություն: Երբ որ այս գործնական քայլերը չկան, այդ հայտարարությունները մշտապես մնալու են հայտարարությունների մակարդակի, և նրանից, թե դրանք կլինեն 10-ը, թե 11-ը, այնքան էլ կարևոր չէ, որքան այն, որ դրանից հետևություններ լինեն»,-«Փաստինֆո»-ի հոտ զրույցում գնահատելով Ադրբեջանի կողմից ԼՂՀ ՊԲ-ի ուղղաթիռը խոցելու փաստին միջազգային հանրության արձագանքը՝ նշեց ԱԺ Արտաքին հարաբերությունների և Պաշտպանության, ազգային անվտանգության եւ ներքին գործերի մշտական հանձնաժողովների անդամ, ԱԺ պատգամավոր Թևան Պողոսյանը:

Այս հարցում, պատգամավորի խոսքով, անելիք ունի նաև հայ դիվանագիտությունը, որ պետք է այդ նույն միջազգային կառույցներին դրդի խոսքից գործի անցնելու:

«Օրինակ, Եվրամիության արտաքին քաղաքականության և անվտանգության բարձագույն հանձնակատար Ֆեդերիկա Մոգերինին հայտարարեց, որ ԵՄ-ն երկու կողմերին դիմում է զսպվածության կոչով և պատրաստ է օգնել հետաքննության հարցում: Ա՛յ, մենք պետք է հիմա առիթն օգտագործենք, որ հնարավոր լինի այս գործը հետաքննել, բոլոր մանրամասները պարզել և մեղավորների անունները ասել: Երբ, որ կարողանանք նաև այս երկրորդ փուլն անել, դրանից հետո կլինի մեկ հայտարարություն, թե՝ քսան, արդեն կարևոր չէ լինի»,- ասաց Թևան Պողոսյանը՝ հիշեցնելով, սակայն, որ հենց որ գալիս է ադրբեջանական կողմի սադրանքների հետաքննության պահը, միջազգային կառույցներն ասում են՝ Ադրբեջանը թույլ չի տալիս:

«Այս իմաստով՝ արդյունք դեռ չկա: Հայտարարությունները կան, պատրաստակամությունը կա, բայց արդյունք չկա: Ուրեմն մենք ամեն ինչ չենք անում, որ հասնենք դրան»,- կարծիք հայտնեց պատգամավորը:

Նրա այս տեսակետը կիսեց նաև Աժ Պաշտպանության, ազգային անվտանգության եւ ներքին գործերի մշտական հանձնաժողովի մեկ այլ անդամ, Ազատ Դեմոկրատներ կուսակցության նախագահ, պատգամավոր Խաչատուր Քոքոբելյանը:

«Միջազգային հանրությունը դեռ շատ վաղուց պետք է հայտարարությունների մակարդակից անցներ գործնական քայլերի,- մեր հարցին ի պատասխան ասաց պատգամավորը,- բայց զուտ գնահատականների առումով եթե նայենք, կարծես թե այս անգամ գոնե ընկալելի էր իրենց կողմից, որ դա մաքուր ադրբեջանական սադրանք էր, ինչն անհրաժեշտ, բայց ոչ բավարար պայման է՝ հետագա գործողությունների համար»:

Խաչատուր Քոքոբելյանի կարծիքով՝ ԵԱՀԿ ՄԽ մակարդակով այս հարցում պետք է լինի հետագա գործողությունների շարունակականություն:

«Հստակ պիտի մատնանշվի, որ ինչպիսի հանցագործություն է կատարվել»,- ասաց մեր զրուցակիցն ու հավելեց, որ իր համոզմամբ ԼՂ կոնֆլիկտի հանգուցալուծման ձգձգման հիմնական պատճառը հենց այն է, որ «միջազգային կառույցները, նկարագրական, ընդհանուր բնույթի հայտարարությունների մակարդակից գործնական քայլերի չեն անցնում»: