Փաստ ինֆո

Քաղաքացիական ակտիվիստ Վարդգես Գասպարիին, դատարանի և ՀՀ ոստիկանության աշխատակիցների նկատմամբ դրսևորած անհարգալից վերաբերմունքի համար, մեղադրանք է առաջադրվել:

Մեղադրանքի համաձայն` Վարդգես Գասպարին վարչական դատարանում 2014թ. ապրիլի 7-ին քննվող գործով դատական նիստի ժամանակ հայցվորի ներկայացուցիչների` ՀՀ ոստիկանության երկու կին ծառայողների հասցեին հնչեցրել է վիրավորական արտահայտությունները` «Դուք հանցագործ սրիականեր եք, մարդասպաններ, թափթփուկներ, լակոտներ, դուք սպանեցիք իմ եղբորը, բավականա մարդասպաններին  թաքցնեք ձեր փեշի տակ, վեց տարի ի՞նչ եք անում, թափթփուկներ, հանցագործներ»:

Ըստ մեղադրանքի՝ Գասպարին նաև վիրավորական արտահայտություններ է հնչեցրել դատական նիստը նախագահող դատավոր Ռուզաննա Հակոբյանի հասցեին՝ «Ձեր նման անարժանապատիվ և անինքնասեր դատավորներ են, որ այսօր իրավիճակը հասցրել են այստեղ, միայն այն, որ Եվրոպական դատարաններում Ձեր վճիռների 46-ից 47-ը ճանաչվել են անվավեր, դա պետք է Ձեզ մի քիչ հուզեր, բայց քանի որ դուք անարժան եք և անինքնասեր, որ Ձեր գործակալական գործողությունն եք կատարում», «Դուք ստոր և անարժանապատիվ դատավորներ եք, որպես գործակալներ՝ այս հանցագործ իշխանությանը պահում եք իրենց գործի վրա»:

Նախաքննական մարմնի գնահատմամբ` այսպիսով՝ Գասպարիին խոչընդոտել է դատական նիստի բնականոն աշխատանքը` այդ կերպ անհարգալից վերաբերմունք դրսևորելով դատարանի նկատմամբ:

Վարդգես Գասպարիին մեղադրանք է առաջադրվել ՀՀ քրեական օրենսգրքի 343-րդ հոդվածի 2-րդ, 3-րդ մասերով: