Փաստ ինֆո

Սահմանադրական դատարանում այս պահին քննվող` ԵՏՄ պայմանագրին Հայաստանի միանալու մասին պայմանագրում Ազգային ժողովի «Բարգավաճ Հայաստան» խմբակցության անդամ Ստեփան Մարգարյանը չի տեսնում Հայաստանի Սահմանադրությանը հակասող կետեր:

Այս մասին նա հայտնեց այսօրվա ճեպազրույցում` հավելելով, որ ինքը, սակայն, սահմանադրագետ չէ, դրա համար կա ՍԴ:

«Եթե ՍԴ-ն համոզիչ պատասխան կտա, որ Սահմանդրությունը  խախտում է, իհարկե, մենք կասենք, որ չանենք այնպիսի բան, որը հակասում է մեր Սահմանադրությանը»,- նշեց նա:

Այս հարցում ԲՀԿ-ի կարծիքը չի կիսում եռյակի մաս կազմող «Ժառանգություն»-ը:

«Կարծում եմ` վաղուց արդեն պարզ է, որ ՍԴ-ն ավելի շատ քաղաքական մարմին է, քան Սահմանադրական դատարան, և դրա համար միշտ ՍԴ-ն կատարում է այն խնդիրը, ինչն իր առջև դնում է օրվա քաղաքական իշխանությունը, քաղաքական մեծամասնությունը»,- ասաց «Ժառանգություն» խմբակցության ղեկավար Ռուբիկ Հակոբյանը:

Ըստ նրա` «որևէ մեկի մոտ այլ սպասելիք չի լինի, քան այն, որ ՍԴ-ն կհաստատի քաղաքական մեծամասնության առաջարկությունը»:

Ռ.Հակոբյանը հայտնեց նաև, որ իրենք դեմ են լինելու պայմանագրի վավերացմանը: Նրա համոզմամբ՝ եթե անգամ պայմանագիրը սահմանադրական էլ լինի, «սա այն դեպքն է, որ Հայաստանի յուրահատկություններից ելնելով՝ պետք է Հայաստանն ընդհանրապես որևէ ալյանսի» չմասնակցի, որովհետև դա ինչոր տեղ խոչընդոտում է ազատ գործելու հնարավորությանը:

«Առավել ևս, որ որևէ միության մեջ չի հստակեցված Արցախի հարցը, ավելի ճիշտ հստակեցված է, որ Արցախը կապ չունի  այդ ալյանսներից որևէ մեկի հետ»,- ընդգծեց Ռ.Հակոբյանը: