Փաստ ինֆո

Սեռական հարաբերության առաջարկ արած տղամարդուն սպանելու մեջ մեղադրվող 42-ամյա Կարինեն մեղսունակ է ճանաչվել, թեև վերջինս վաղ մանկության տարիներին վթարի է ենթարկվել, որից հետո ունեցել է հոգեկան խնդիրներ ու բուժվել տարբեր հոգեբուժարաններում:

Այս մասին «Փաստինֆո»-ի թղթակցին հայտնեց Կարինեի պաշտպան Կարեն Մանուչարյանը՝ որոշ մանրամասներ պատմելով դեպքի մասին։

Մեղադրյալն  ամուսնու հետ բնակվել է վարձակալած բնակարանում, և այդ նույն բակում է բնակվել նաև տուժած տղամարդը:

Տուժող տղամարդը որոշակի հակում է ունեցել խմիչքի նկատմամբ։ Դեպքի օրը ևս խմիչքի ազդեցության տակ է եղել և, օգտվելով այն հանգամանքից, որ Կարինեի ամուսինն աշխատանքի է, մտել է նրանց տուն:

Կարինեն պաշտպանին հայտնել է, որ այդ պահին քնած է եղել և հանկարծ արթնանալով տեսել է, որ տուժող տղամարդը գլխավերևում նստած է և փորձել է բռնությամբ ստիպել իրեն սեռական հարաբերություն ունենալ իր հետ, իսկ կինը վախեցած նրան հրել է դուրս հանել սենյակից, ապա՝ դուռը կողպել: Սակայն տղամարդը չի հանդարտվել և շարունակել է մի քանի անգամ գնալ գալ, ոտքով հարվածել Կարինեի սենյակի դռանը՝ սպառնալով սպանել, մորթել, եթե չհամաձայնի իր հետ սեռական հարաբերություն ունենալ:

Մեր զրուցակիցը պատմեց, որ Կարինեն սթրեսի մեջ է ընկել, անգամ փորձել է օգնություն կանչել, բայց չի կարողացել, չի հասկացել, թե ինչ է կատարվել, սթափվելուց հետո հասկացել է, որ ինքը գտնվում է սենյակում՝ կանգնած, դանակը՝ ձեռքին, ձախ ձեռքի վրա՝ արյան կաթիլներ:

Պաշտպանը միջնորդել է համալիր դատահոգեբանական և դատահոգեբուժական փորձաքննություն նշանակել՝ պարզելու, թե իր պաշտպանյալի մոտ կուտակային աֆեկտ գոյություն ունի՞, թե՝ ոչ, պաշտպանյալը աֆեկտային վիճակու՞մ է գտնվել, թե՝ ոչ, ինչը քննիչը մերժել է, սակայն պաշտպանը այն բողոքարկել է դատախազին:

Բացի այդ, պաշտպանը նշեց, որ մեղադրական եզրակացության մեջ նշված է, թե տուժողը մեկ անգամ է գնացել իր պաշտպանյալի տուն, այնինչ բազմաթիվ անգամ է դա տեղի ունեցել և նախկինում ևս եղել է բռնաբարության մի քանի փորձ:

«Եթե նախաքննական մարմինը հավակնում է օբյեկտիվ նախաքննության, ապա պարտավոր էր դա ևս պարզել»,- նշում է Կարեն Մանուչարյանը:

Կարինեն պաշտպանին հայտնել է, որ տուժողին կողմից նախկինում ևս բռնաբարության փորձեր են եղել, «ձեռք է գցել» նրան, սպառնացել, անգամ բանը հասել է նրան, որ Կարինեն ամուսնուն է պատմել այդ մասին, իսկ վերջինս էլ խոսելով տուժողի հետ ասել է, որ հեռու մնա իր կնոջից:

Մինչև պաշտպանի՝ գործին ներգրավվելը՝ կինն առաջադրված մեղադրանքում իրեն մեղավոր է ճանաչել, սակայն հետո փոխել է իր դիրքորոշումը։

Ավելին, պաշտպանին հայտնել է, որ ներկայումս էլ չի ժխտում, որ սթափվելուց հետո իր ձեռքում դանակ է եղել, սակայն մանրամասները չի հիշում, իսկ քննիչն իր տված ցուցմունքն արձանագրել է ոչ ամբողջական ծավալով, այլ՝ ընտրովի:

Ըստ մեղադրանքի՝ կինը 30.06.2014թ. Երևանի Անդրֆեդերացիայի 1-ին նրբանցքի թիվ 2 տան նկուղային հարկում գտնվող սենյակներից մեկում, վրդովված լինելով ոմն Կարենի կողմից իրեն սեռական հարաբերություն ունենալու առաջարկ կատարելու հանգամանքից, խոհանոցային դանակով երկու անգամ հարվածել է վերջինիս կրծքավանդակին՝ դիտավորությամբ ապօրինաբար նրան զրկելով կյանքից:

Կարինեին մեղադրանք է առաջադրվել ՀՀ քրեական օրենսգրք 104-րդ հոդվածի 1-ին մասով: Նրա նկատմամբ որպես խափանման միջոց է ընտրվել կալանավորումը: