Փաստ ինֆո

Երևանի Տերյան փողոցում ուսանող Տիգրան Հայրապետյանի սպանության գործով այսօրվա դատական նիստում ավարտվեց դատական վիճաբանությունների փուլը:

Անչափահաս ամբաստանյալ Հայկ Աղամալյանը պնդեց իր ցուցմունքները, ըստ որոնց՝ նախաքննության ընթացքում Տիգրան Հայրապետյանի դատաբժշկական փորձաքննությանը ծանոթանալուց ու տուժողի լուսանկարը տեսնելուց հետո համոզվել է, որ ինքը դանակով խփել այլ՝ սև բաճկոնով անձի: Ըստ նրա՝ միայն երկու ամիս անց է հայտնել այդ մասին, քանի որ իր դիրքորոշման հետ կապված տարաձայնություններ են եղել իր պաշտպանի հետ. նա հրաժարվել է նրանից, և միայն նոր պաշտպան ներգրավելուց հետո է հայտարարել այդ մասին:

Ամբաստանյալը հայտարարեց, որ պարզաբանումների գնացող մեծ խմբին ինքը չի առաջնորդել, ինքն այդ խմբից ընդամենն երկու հոգու էր ճանաչում: Մեղադրանքը, ըստ նրա, անհիմն է, վերացական և նպատակ ունի մեղադրանքի համար հիմքեր ստեղծել:
Անչափահասը նաև հայտարարեց, որ չի ընդունում տուժողի իրավահաջորդի ու նրա ներկայացուցչի ներկայացրած քաղհայցը, քանի որ ինքը որևէ կապ չունի Տիգրան Հայրապետյանին կյանքից զրկելու հետ:

Ամբաստանյալի մայրը հայտարարեց, որ նախաքննության ընթացքում իր անչափահաս որդու նկատմամբ մի շարք դատավարական խախտումներ են եղել, իր որդին նաև ծեծի է ենթարկվել ոստիկանների կողմից, նրանք ստիպել են, որպեսզի իր որդին խոստովանի՝ սպառնալով, որ այլապես «վատ կլինի քեզ, քրոջդ, մորդ համար»:

Ամբաստանյալի մայրը ևս մեկ անգամ հայտարարեց, որ իր որդու դեմ ցուցմունք տված վկա Մարտին Գևորգյանն իր որդու հանդեպ թշնամանք ուներ, ուստի՝ նրա ցուցմունքները չպետք է գնահատվեն որպես արժանահավատ: Քննությունը, ըստ օրինական ներկայացուցչի, թերի է ընթացել, անգամ որդու խոսոտովանական ցուցմունքներ տալու պարագայում քննիչը պետք է պարզեր մեղադրանքին առնչվող մի շարք կարևոր հանգամանքներ, ինչը չի արել:

Ըստ ամբաստանյալի մոր՝ իր որդին ընտանիքում մեծացած, սիրով ու հոգատարությամբ շրջապատված երեխա է եղել, չէր կարող մարդ սպանել: «Մի կործանեք իմ երեխայի կյանքը»՝ դիմելով դատարանին, ասաց նա:

Ամբաստանյալի հայրը ևս հայտարարեց, որ իր որդին մեծերին ու փոքրերին հարգող, լավ սովորող ու պարտաճանաչ երեխա է եղել, «չէր կարող ինչ-որ մեկին կյանքից զրկել», ուստի՝ խնդրեց նրան ազատել ու արդարացնել:

Մեղադրող Հակոբ Մելքոնյանն իր հերթին հայտարարեց, որ ամբողջությամբ պնդում է մեղադրական ճառը, որով հանդես է եկել պաշտպանական կողմի բոլոր հիշյալ պատճառաբանությունները հաշվի առնելով:

Մեղադրողն անդրադարձավ նաև խոշտանգումների վերաբերյալ հայտարարությանը. Հատուկ քննչական ծառայությունում դրա վերաբերյալ քննություն է կատարվել ու որոշվել է քրեական գործ չհարուցել, պաշտպանական կողմն այդ որոշումը չի բողոքարկել:

Մեղադրողը նշեց, որ գործից անջատված մասով մանրակրկիտ քննվել ու մասնավորապես վկաների ցուցմունքներով հիմնավորվել է, որ ամբաստանյալի կողմից սև բաճկոնով անձի՝ դանակով հարվածելու դեպք տեղի չի ունեցել:

Տուժողի իրավահաջորդի ներկայացուցիչ Ռուբեն Բալոյանը, պաշտպանական կողմի պնդումներին ի պատասխան, հայտարարեց, որ ամբաստանյալն առաջնորդել է խմբին, եթե կարողացել է 10-15 րոպեում այդպիսի խումբ ձևավորել: Նա ընդգծեց, որ վկաների  70 տոկոսի ցուցմունքներով հաստատվել է մեղադրանքը, պարզապես պաշտպանական կողմը փորձում է խուսափել պատասխանատվությունից:

«Հայկ Աղամալյանն այս ընտանիքին առավելագույն ցավ է պատճառել, ուստի՝ պետք է ստանա առավելագույն պատիժ»,- ասաց նա:

Տուժողի իրավահաջորդ Պատվական Հայրապետյանն իր հերթին համոզմունք հայտնեց, որ Հայկ Աղամալյանը փողոցում մեծացած երեխա է, իր իսկ ցուցմունքով նա իր մոտ դանակ է ունեցել մեկ տարի, այն պահել է ծառի տակ ու դրանով խփել է ծառին:

«Եվ մի պահ էր գալու, որ այդ դանակը կօգտագործվեր,- ասաց տուժողի իրավահաջորդը՝ հավելելով,- հնարածին, շինծու խոսակցություններ են»:

Ուստի՝ խնդրեց դատարանին երկու ամբաստանյալիների՝ Հայկ Աղամալյանի ու նրա ընկեր Դավիթ Մանուկյանի նկատմամբ նշանակել առավելագույն պատիժ, որպեսզի հասկանան, թե ինչ է նշանակում 19  տարի երեխա պահել մեծացնել՝ լուրջ, մաքուր երեխա, ու 40 վայրկյանում կորցնել նրան: «Բարոյական չեմ համարում այն, ինչ որ ներկայացնում են, նրանք արժանի են իրենց մեղադրանքին»:      

Տուժող կողմը հայտարարեց, որ ամբողջությամբ պնդում է 3 մլն 450 հազար ՀՀ դրամի քաղհայցը, որը հանցագործությամբ անմիջականորեն պատճառված վնասն է:

Ի դեպ, տուժողի իրավահաջորդի ներկայացուցիչ Պատվական Հայրապետյանը լրագրողներին հայտնեց, որ այդ գումարն իրեն անձնապես պետք չէ, այն պետք է փոխանցվի հատուկ հաշվեհամարի, որտեղից էլ, նույնպես փոխանցումներով, ուղղվելու է   բարեգործական նպատակների:

Ամբաստանյալները դատարանից ժամանակ խնդրեցին՝ վերջին խոսքին նախապատրաստվելու համար ու թեև օրենքով նման ընթացակարգ նախատեսված չէ, դատարանը, հաշվի առնելով, որ մեկ ամբաստանյալն անչափահաս է, իսկ մյուսը մեղսագրվող հանցագործությունը կատարելու ժամանակ անչափահաս է եղել ու նաև հաշվի առնելով այն, որ այդ ժամանակը նրանք պետք  է օգտագործեն՝ ի պաշտպանություն իրենց դիրքորոշումները ներկայացնելու համար, դատարանը բավարարեց միջնորդությունը: