Փաստ ինֆո

Ազգային ժողովի նիստում մեկնարկել է խորհրդարանի ոչ իշխանական ուժերի նախաձեռնությամբ հրատապ ճանաչված՝ Հայաստանի Հանրապետության ընտրական օրենսգիրքը բարեփոխելու մասին ԱԺ որոշման նախագծի քննարկումը:

Հիշեցնենք, որ ԸՕ-ի բարեփոխումը իշխանություններին քառյակի ներկայացրած 12 պահանջների թվում է: ԸՕ-ի բարեփոխման կողմնակից է նաև «Օրինաց երկիր»-ը, որը խորհրդարանում նախաձեռնել է այդ խնդրով բոլոր խմբակցությունների ներկայացուցիչներից բաղկացած աշխատանքային խմբի ստեղծում:

Հիմնական զեկուցող, «Ժառանգություն» խմբակցության ղեկավար Ռուբիկ Հակոբյանը, դիմելով քաղաքական մեծամասնությանը, կոչ արեց ձեռնամուխ լինել ԸՕ-ի բարեփոխմանը՝ վերահաստատելով նախօրեին եռյակի նիստից հետո լրագրողներին հայտնած դիրքորոշումը:

Հիշեցնենք, որ նախօրեին եռյակը քննարկել էր ՀՀ Նախագահ Սերժ Սարգսյանի անդրադարձը եռյակի՝ 12 կետերից բաղկացած պահանջներին, ինչից հետո Ռ.Հակոբյանը հայտնել էր եռյակի դիրքորոշումը՝ եթե «իմիտացիոն, ուշադրությունը շեղելու և բարի երևալու» խնդիր չի դրված իշխանությունների կողմից, ապա վերջինս կարող է մի քանի ժամում անմիջապես լուծում տալ 12 կետերից մեկին՝ Ընտրական օրենսգրքի բարեփոխումներին, ինչը ո՛չ ժամանակ, ո՛չ ճանապարհային քարտեզ, ո՛չ էլ ֆինանսական միջոցներ չի պահանջում:
 
Ոչ իշխանական ուժերը, մասնավորապես, առաջարկում են ԱԺ-ի 100 տոկոս համամասնական ընտրակարգով ձևավորման կարգ, ընտրական հանձնաժողովների ձևավորման նոր կարգի սահմանում, վերահսկելի, բազմակի քվեարկությունների և լցոնումների բացառում, քվեարկության արդյունքների հաշվարկման համակարգի կատարելագործում, նախընտրական քարոզչության սահմանման հասանելիության և հավասարության ապահովում:

Այս պահին հիմնական զեկուցողը պատասխանում է պատգամավորների հարցերին: