Փաստ ինֆո

«ԱրմենՏել»-ի նախկին գլխավոր տնօրենի՝ հետախուզման մեջ գտնվող Իգոր Կլիմկոյի կողմից ֆինանսական չարաշահումներ թույլ տալու գործը նոր փուլ է թևակոխում: Այսպիսի մեկնաբանություն է արել «Ժողովուրդ»-ը:

Լրատվամիջոցի տեղեկություններով՝ Բելառուսի Հանրապետությունում կալանավորված Վ.Սաչկովը, ով «ԱրմենՏել»-ի նախկին ֆինանսական տնօրենն է, կարտահանձնվի Հայաստանին:

Թերթը գրում է, որ իրենց ունեցած տեղեկությունների համաձայն՝ մոտ մեկ ամիս առաջ Հայաստանի իրավապահները Վ.Սաչկովին ՀՀ իրավապահներին արտահանձնելու վերաբերյալ փաստաթղթերն ուղարկել են Բելառուս, որին այդ երկրի իրավապահները դրական պատասխան են տվել:

Ըստ թերթի՝ հայ իրավապահների խումբ կմեկնի Բելառուս՝ Սաչկովին Հայաստան բերելու համար:

Հայաստանում Սաչկովի պաշտպանությունն իրականացնում է Հայկ Շահումյանը, ով հաստատել է Սաչկովին Հայաստանին արտահանձնելու՝ լրատվամիջոցի տեղեկությունը:

Միաժամանակ թերթը հիշեցնում է, որ «ԱրմենՏել»-ում չարաշահումների մասին հանրությանը հայտնի դարձավ այս տարվա հունիսին:

Պարզվեց, որ քրեական գործը, որի շրջանակներում Իգոր Կլիմկոն մեղադրվում է 10-15 միլիարդ դրամ յուրացնելու մեջ, դեռևս այս տարվա փետրվարին հարուցվել է ԱԱԾ-ում:

Ըստ լրատվամիջոցի տեղեկությունների՝ չարաշահումը բացահայտվել է «ԱրմենՏել»-ի ներկայիս գլխավոր տնօրեն Անդրեյ Պատախինի նշանակվելուց հետո: Ըստ այդմ, ղեկավարումն ստանձնելուց և ընկերության ֆինանսական փաստաթղթերին ծանոթանալուց հետո նոր տնօրենը հայտնաբերել է, որ 2009-2012թթ արտերկրից կատարված հեռախոսազանգերի դիմաց փոխանցված գումարների մի զգալի մասը բացակայում է: Դրանից հետո Անդրեյ Պատախինը դիմել է իրավապահներին:

Ըստ փորձագետների՝ երեք տարվա ընթացքում «ԱրմենՏել»-ից հափշտակվել է մոտ 500մլն դոլար: Ընկերությունն այս գործով ճանաչվել է տուժող:

Իգոր Կլիմկոյի նկատմամբ հայտարարված հետախուզումը մինչ օրս արդյունք չի տվել:Հարուցված քրեական գործի շրջանակներում կալանավորվել է «ԱրմենՏել»-ի անվտանգության պետը՝ Աշոտ Պողոսյանը:

Հոդվածն ամբողջությամբ կարող եք կարդալ «Ժողովուրդ» օրաթերթի` 12.11.2014թ. համարում:

Լուսանկարը՝ Armenpress-ի