Փաստ ինֆո

Ազգային ժողովն այսօր կշարունակի 2015թ. պետական բյուջեի նախագծի նախնական տարբերակի քննարկումը:

Մտքերի փոխանակության ավարտից հետո, ԱԺ կանոնակարգ-օրենքի համաձայն, կհայտարարվի քննարկման ընդմիջում՝ առնվազն 4 օրով:    

Բյուջեի մասին օրենքի նախագծի քննարկումը վերսկսվելուց առնվազն 24 ժամ առաջ կառավարությունն իր համար ընդունելի առաջարկների հիման վրա լրամշակված բյուջեի նախագծի վերջնական տարբերակը կներկայացնի ԱԺ:
 
2015թ. պետական բյուջեի նախագծի վերջնական տարբերակը կքննարկվի ԱԺ լիագումար նիստում և կդրվի քվեարկության:

Նշենք, որ, ներկայումս քննարկվող նախնական տարբերակի համաձայն, եկամտային մասը  նախատեսված է 1 տրիլիոն 184.5 մլրդ դրամ, ինչը 2014թ. համար հաստատված ցուցանիշից 48.6 մլրդ դրամով կամ 4,3 տոկոսով ավելի է: Եկամուտների կազմում մեծ տեսակարար կշիռ կունենան հարկերն ու տուրքերը` 95,5 տոկոս:  

Ծախսերի գծով նախատեսված է շուրջ 1 տրիլիոն 298.6 մլրդ դրամ, ինչը 2014 թ. հաստատված մակարդակի համեմատ ավելի է շուրջ 52.2 մլրդ դրամով:

Դեֆիցիտի գումարը նախատեսված է 114.1 մլրդ դրամի չափով կամ 2014թ-ի ցուցանիշից 3,6 մլրդ դրամով ավելի:

Ըստ կառավարության, 2015թ-ի պետական բյուջեի նախագիծն ունի հստակ սոցիալական ուղղվածություն. բյուջեի ընդհանուր ծախսերի շուրջ կեսը կազմում են սոցիալական, մշակութային բնագավառների ծախսերը:

Ընդ որում`միայն կրթության, սոցիալական պաշտպանության, առողջապահության ոլորտների ֆինանսավորումը նախատեսված է շուրջ 596 մլրդ դրամ, ինչը 25 մլրդ դրամով ավելի է, քան 2014 թվականին: