Փաստ ինֆո

Ազգային ժողովի «Ժառանգություն» խմբակցության անդամ Զարուհի Փոստանջյանի հեղինակած` «Լեռնային Ղարաբաղի (Արցախի) և Հայաստանի Հանրապետությունների անվտանգության ապահովման ռազմաքաղաքական հիմնադրույթների հայեցակետերի մասին» ԱԺ որոշման նախագիծը, որով, մասնավորապես, առաջարկվում էր ճանաչել ԼՂՀ-ն, չընդունվեց:

Նախագծին կողմ էին 8, ձեռնպահ 1 պատգամավոր:

Ինչպես և նախօրեին հայտարարվել էր, նախագծին կողմ քվեարկեցին ՀՅԴ խմբակցության անդամները, «Ժառանգություն»-ից` խմբակցության ղեկավար Ռուբիկ Հակոբյանը և նախագծի հեղինակ Զարուհի Փոստանջյանը, ինչպես նաև՝ «Հայ ազգային կոնգրես-ից` Նիկոլ Փաշինյանը:

Ձեռնպահ էր ՀԱԿ-ից Հրանտ Բագրատյանը:

Ի դեպ` ՀԱԿ-ի անունից խմբակցության ղեկավար Լևոն  Զուրաբյանը դեռևս նախօրեին հայտարարել էր քվեարկությանը չմասնակցելու մասին:

Նույն դիրքորոշումն ունեին նաև մյուս խմբակցությունները, որոնց կարծիքով՝ ԼՂՀ-ի Ճանաչումն այս պահին ժամանակավրեպ է:

Ինչպես քվեարկությունից առաջ հայտարարեց ՀՀԿ խմբակցության անդամ Արտակ Զաքարյանը, ըստ էության այս նախաձեռնությունը ԱԺ-ի լիագումար նիստում արդեն չորրորդ անգամ է քվեարկվում:

«Յուրաքանչյուր անգամ խորհրդարանը հայտնվում է բավական բարդ վիճակում, որովհետև շատ լավ կարելի է պատկերացնել և' կողմ, և' դեմ, նաև ձեռնպահ քվեարկողների մոտեցումները»,- ասաց նա` հավելելով, որ մի բան հստակ է, որ այս նախաձեռնությունը, երբ անհրաժեշտ լինի ընդունել, պետք է լինի բոլոր 131 պատգամավորների նախաձեռնությամբ և միասնական համաձայնությամբ: