Փաստ ինֆո

Վարդան Պետրոսյանի կնոջ՝ Անի Համելի փաստաբաններ Տիգրան Եգորյանն ու Լուսինե Հակոբյանը դիմել են ՀՀ փաստաբանների պալատի նախագահ Արա Զոհրաբյանին՝ փաստաբան Ռուբեն Բալոյանի նկատմամբ կարգապահական վարույթ հարուցելու  պահանջով:

«Փաստինֆո»-ի ունեցած այս տեղեկությունները հաստատեց ՀՀ Փաստաբանների պալատի մամուլի խոսնակ Հայկ Հակոբյանը:

Մեր տեղեկություններով` վարույթ հարուցելու դիմումում փաստաբանները մատնանշում են իրենց գործընկերոջ կողմից իրականությանը չհամապատասխանող, վարկաբեկող տեղեկություններ տարածելու և անհարգալից վերաբերմունք դրսևորելու հանգամանքը, ընդ որում` ոչ միայն վթարի համար մեղադրվող դերասան Վարդան Պետրոսյանի, այլև նրա հարազատների ու նրա փաստաբան Նիկոլայ Բաղդասարյանի նկատմամբ:

Ինչպես մեզ հետ զրույցում նշեց Փաստաբանների պալատի մամուլի խոսնակ Հայկ Հակոբյանը, փասատաբանների դիմումն այս պահին քննարկման փուլում է, կընդունվի՞ այն վարույթ, թե՞ կմերժվի, պարզ կդառնա միայն քննարկումների ավարտին:

Ի դեպ, ըստ գործող կարգի, վարույթ հարուցելու կամ մերժելու մասին եզրակացությունը կազմելու համար տրամադրվում է առավելագույնը 2 ամիս ժամանակ, իսկ վերջնական որոշումը կայացնելու համար` առավելագույնը 6 ամիս:

Նշենք նաև, որ սա փաստաբան Ռուբեն Բալոյանի վերաբերյալ կարգապահական վարույթ հարուցելու մասին առաջին դիմումը չէ, որ ստացվել է փաստաբանների պալատի նախագահի անունով: Արա Զահրաբյանի որոշմամբ՝ Բալոյանի նկատմամբ մեկ վարույթ արդեն իսկ  ներկայում ընթացքի մեջ է:

Հիշեցնենք՝ հուլիսի 18-ին Կոտայքի մարզի ընդհանուր իրավասության դատարանի Աբովյանի նստավայրի բակում` դերասան Վարդան Պետրոսյանի նկատմամբ քրեական գործով հերթական դատական նիստից հետո, միջադեպ էր տեղի ունեցել Վարդան Պետրոսյանի փաստաբան Նիկոլայ Բաղդասարյանի և տուժողների շահերիների կայացուցիչ Ռուբեն Բալոյանի միջև, որն ավարտվել էր միայն դատական կարգադրիչների միջամտությամբ:

Այս միջադեպի շուրջ «forrights.am» կայքի «Արա, ես քեզ հետ տղայականով եմ խոսում, ոչ թե՝ որպես փաստաբան» հրապարակման և կայքի խմբագրությունից ստացված դիմումի հիման վրա հուլիսի 22-ին ՀՀ փաստաբանների պալատի նախագահ Արա Զոհրաբյանի որոշմամբ փաստաբան Ռուբեն Բալոյանի նկատմամբ կարգապահական վարույթ էր հարուցվել:

Ռուբեն Բալոյանն էլ իր հերթին դիմել է Փաստաբանների պալատի նախագահին` Նիկոլայ Բաղդասարյանի նկատմամբ կարգապահական վարույթ հարուցելու պահանջով` իր դիմումում հայտնելով, որ հուլիսի 17-ի դատական նիստի ժամանակ Նիկոլայ Բաղդասարյանն իր հասցեին ասել է. «Ռուբեն Բալոյանին ասածս հռետորական էր, բայց նա այնքան ա սուտ ասում, որ …»: Ռուբեն Բալոյանն իր դիմումի հետ ներկայացրել էր նաև դատական նիստի համապատասխան ձայնագրությունը:

Դրանից օրեր անց` հուլիսի 24-ին, Ռուբեն Բալոյանը մեկ այլ դիմում էլ էր ներկայացրել Պալատի նախագահին` այս անգամ իր մեկ այլ գործընկերոջ` փաստաբան Վահագն Մարտիրոսյանի նկատմամբ կարգապահական վարույթ հարուցելու պահանջով: Ըստ Ռուբեն Բալոյանի՝ Մարտիրոյանը ֆեյսբուքում իր հասցեին վիրավորական մեկնաբանություն է թողել «forrights.am» կայքի հիշյալ հրապարակման տակ:

Ի դեպ, Ռուբեն Բալոյանն այս հոդվածի վերաբերյալ նաև դատական հայց էր ներկայացրել, որի քննությունը նշանակված է այս ամսվա վերջին:

Ինչ վերաբերում է կարգապահական այս 3 վարույթներին, ապա, ինչպես տեղեկացանք Փաստաբանների պալատից, դրանք դեռ ընթացքի մեջ են:

Լուսանկարը՝ Aravot.sm-ի