Փաստ ինֆո

Նախորդ քառօրյայում ԱԺ պատգամավոր Զարուհի Փոստանջյանը Սերժ Սարսգյանին և իշխանությանը մեղադրեց պետական դավաճանության մեջ, և նրա խոսափողն անջատվեց պատճառաբանությամբ, թե այդ ելույթը չի տեղավորվում կանոնակարգի կամ հարցի շրջանակներում:

Այս մասին այսօր ԱԺ նախագահին հիշեցրեց «Հայ ազգային կոնգրես» խմբակցության անդամ Նիկոլ Փաշինյանը` հավելելով, որ դրանից հետո ելույթ ունեցան «Հանրապետական» խմբակցության ղեկավար Վահրամ Բաղդասարյանը և նույն խմբակցության անդամ Հայկ Բաբուխանյանը, ովքեր արդեն ընդդիմությանը մեղադրեցին պետական դավաճանության մեջ, բայց նրանց խոսափողը չանջատվեց:

Ընդդիմադիր պատգամավորը նաև նկատեց, որ ԱԺ նախագահն ի պաշտոնե պետք է հավասար կանոններ ապահովի բոլորի համար: Ն.Փաշինյանն առաջարկեց պատգամավորների` ԱԺ կանոնակարգ-օրենքով նախատեսված ելույթների տևողությունը չսահմանափակել և արտահայտվելու հնարավորություն տալ:     
                         
Ի պատասխան՝ Գալուստ Սահակյանն ասաց, թե, կարծում է, որ պատգամավորներն արտահայտվելու համար բավականին շատ միջոցներ ունեն, միայն ԱԺ նիստերի դահլիճը չէ: «Այլ բան է, որ պատգամավորները դեբատի ժամանակ բանավիճում են և կարող են կոռեկտության սահմաններից դուրս գալ, այլ բան է, որ պետությանը վարկաբեկում են, և ես չեմ կարծում` այստեղ պիտի հնարավորինս հավասար պայմաններով դիտարկենք հարցը»,- ասաց ԱԺ նախագահը` ընդգծելով, որ բոլորը պետք է բարեկրթության սահմանները չխախտեն:

«Ամենալավ լավ բանը մարդու համար, հասարակության համար էլեկտրաէներգիան է, բայց եթե կարճ միացում է տալիս, հենց ինքը` էլեկտրաէներգիան, չի գործում»,- հայտարարեց Գ.Սահակյանը` ընդգծելով, որ ինքը բարեկրթության կողմնակից է:

Ն.Փաշինյանին հակադարձեց նաև Հ.Բաբուխանյանը. «Մեր գործընկերները պետք է պատրաստ լինեն, որ ցանկացած վիրավորանք, հերհյուրանք մեր պետության հասցեին պետք է ստանա համարժեք պատասխան մեր կողմից»:

Ն.Փաշինյանը նաև զարմանք հայտնեց, որ ԱԱԾ-ն մինչև հիմա չի հետաքրքրվել ՀՀԿ խմբակցության ղեկավարի հայտարարությամբ, ով նախորդ քառօրյայում ընդդիմությանը մեղադրել էր «ալիևյան նավթադոլարներից  ֆինանսավորվելու և ԱԺ-ում համապատսխան գործունեություն ծավալելու կապակցությամբ»:

Ընդդիմադիր պատգամավորը ԱԱԾ-ի ուշադրությունը հրավիրեց Վ.Բաղդասարյանի վերոհիշյալ հայտարարության վրա: Ըստ նրա՝ եթե իսկապես պարզվի, որ նման մարդիկ կան, նրանց գործունեությունը պետք բացահայտվի և նրանք պետք է պատժվեն:

«Եթե հետաքննությամբ համապատասխան փաստեր չներկայացվեն, պետք է արձանագրենք, որ իշխանության համար Ալիևը ծխածածկույթ է, որով մարդկանց ուշադրությունն ուզում են շեղել և այդ ծխածածկույթի տակ անել իրենց մութ գործերը: Տվյալ դեպքում իշխանության մասին է խոսքը»,- հայտարարեց Ն.Փաշինյանը: