Փաստ ինֆո

Այսօր՝ նոյեմբերի 9-ին Ստեփանակերտի պատկերասրահում տեղի կունենա «Տոհմածառ» հանրապետական առաջին մրցույթի արդյունքների ամփոփումը և «Ծառն արմատներով է կանգուն» խորագրով ցուցահանդեսի բացումը:

Ինչպես հայտնում են ԼՂՀ մշակույթի և երիտասարդության հարցերի նախարարությունից, մրցույթի հատերն ընդունվել են մայիսի 1-ից մինչև հուլիսի 1-ը, իսկ պատրաստի աշխատանքները՝ մինչև սեպտեմբերի 10-ը: Մասնակիցների տարիքային սահմանափակում չի եղել: Նախատեսված էր 2 անվանակարգ. «Իմ տոհմը» և «Ծագումնաբանությունն իմ նախասիրությունն է»:

Առաջին անվանակարգում ներկայացվել են սեփական տոհմի ծագումնաբանական հետազոտություններին նվիրված աշխատանքներ՝ առնվազն 150 տարի ժամանակահատվածի ընդգրկմամբ, երկրորդ անվանակարգում՝ արցախյան հայտնի գերդաստանների ծագումնաբանական հետազոտություններին նվիրված աշխատանքներ:

ԼՂՀ 6 շրջաններից՝ Ասկերանի, Հադրութի, Մարտակերտի, Մարտունու, Շահումյանի և Շուշիի, մայրաքաղաք Ստեփանակերտից և ՀՀ-ից (ք. Երևան) իրենց աշխատանքներն են ներկայացրել մրցույթի 19 մասնակից:

Մրցույթին ներկայացված  աշխատանքների թվայնացված տարբերակներն ուղարկվել են գնահատող հանձնախմբի 7 անդամներին:

Հանձնախմբի անդամները, ներկայացված աշխատաքներն ուսումնասիրելուց հետո, նոյեմբերի 8-ին Ստեփանակերտի պատկերասրահում 10-բալանոց սանդղակով կգնահատեն յուրաքանչյուր աշխատանք՝ փակ քվեարկությամբ: Հաշվի կառնվեն աշխատանքների ճշգրտությունը, արժանահավատությունը, գրագիտությունը, գեղագիտությունը, ոճը, մրցույթի թեմատիկային համապատասխան լինելը, գեղարվեստական և ստեղծագործական ձևավորումը, տոհմի հետազոտության խորությունը, օգտագործված նյութերի լայնությունը, կազմկոմիտեի պահանջների կատարումը: Մրցույթի հաղթողները կորոշվեն հավաքած միավորների գումարով:

Մրցույթի կազմակերպումը  նպատակը պատմական, ծագումնաբանական և պատմաերկրագիտական գիտելիքների զարգացման, հասարակության մեջ ծագումնաբանական ավանդույթների վերականգնումն է:

Մրցույթի կազմակերպիչը ԼՂՀ մշակույթի և երիտասարդության հարցերի նախարարությունն է: