Փաստ ինֆո

Սեքս-սկանդալի կիզակետում հայտնված Հայաստանի պետական ճարտարագիտական համալսարանի (ՀՊՃՀ)  ռեկտոր Հովհաննես Թոքմաջյանը Տեղեկատվական և հեռահաղորդակցական տեխնոլոգիաների վարչության պետ Վլադիմիր Խոեցյանին օրերս երկրորդ նկատողությունն է տվել ու ազատել աշխատանքից: Ֆիզիկայի ամբիոնի վարիչի և պրոռեկտորի պաշտոններից հեռացվել է նաև Վ.Խոեցյանի քեռին՝ Աշոտ Խաչատրյանը:

Ի տարբերություն ռեկտորի, ով գտնում է, որ Վլադիմիր Խոեցյանը աշխատանքից ազատվել է օրենքին համապատասխան, վերջինս համոզված է, որ իրեն ազատել են Աշխատանքային օրենսգրքի խախտումով և պատրաստվում է նկատողությունը և աշխատանքից հեռացնելու որոշումը վիճարկել Վարչական դատարանում:

Ավելին, News.am-ի փոխացմամբ, նա պատրաստվում է բաց նամակով դիմել ԿԳ նախարար Արմեն Աշոտյանին և խնդրել, որ նա որևէ լուծում տա Պոլիտեխնիկում ստեղծված իրավիճակին. «Խնդրելու եմ, որ ինքը վերանայի իր չխառնվելու քաղաքականությունը, որովհետև ռեկտորն արդեն բոլոր չափ ու սահմաններն անցել է, վտանգված է պոլիտեխնիկի մթնոլորտը»:

Ըստ Վ.Խոեցյանի՝ ռեկտորը իրեն երկրորդ նկատողությունը տվել ու աշխատանքից հեռացրել է, երբ նրա տված առաջին նկատողությունը դեռ դատական վարույթի մեջ է: «Աշխատանքային օրենսգրքում նշված է, որ եթե նկատողությունը դատական վարույթի մեջ է, ինքն ուժ չունի դեռևս»,-ասել է Վ.Խոեցյանը:

Վ.Խոեցյանի համոզմամբ՝ նման կերպ ռեկտորը հաշվեհարդար է տեսնում իր քեռու՝ Աշոտ Խաչատրյանի, հետ: Նրա պարզաբանմամբ՝ գիտխորհրդով ընտրված մարդուն առանց կոլեգիալ որոշման, ուղղակի ռեկտորի հրամանով, պաշտոնից ազատելու իրավունք ոչ  ոք չունի:

«Բացի այդ, ընդամենը երկու ամիս առաջ իր նախաձեռնությամբ բացված` պրոռեկտորի հաստիքի կրճատման հարց էր դրել գիտխորհրդի նիստում`ասելով,  թե նպատակահարմար չի գտնում, որ այդ հաստիքը լինի: Խայտառակված քվեարկություն անցկացրեց, որ տենց ընթացակարգ գոյություն չունի: Հերթով անունները կարդում էր, տեղից ասում էին` կողմ են, թե դեմ:  90 անդամ էր ներկա գիտխորհրդին, բայց 45 կողմ, 45 դեմ եղավ: Ռեկտորն, առանց արդյունքներն ամփոփելու, 10 րոպե ընդմիջում արեց, առողջական խնդիրներ ունեցող մի դեկանի տարավ ներսի սենյակ, հետո այդ մարդը փոխեց իր ձայնը, դարձավ 44 դեմ և 46 կողմ»,-ասել է Խոեցյանը`  նշելով, որ դա հակասում է Պոլիտեխնիկի կանոնադրությանը, ըստ որի նման որոշում կարող է ընդունվել գիտխորհրդի նիստում միայն այն դեպքում, երբ կողմ է քվեարկում գիտխորհրդի անդամների ընդհանուր թվի, այլ ոչ թե նիստին ներկաների 50 տոկոսից ավելին:

Հիշեցնենք, որ մոտ երկու ամիս առաջ համացանցում հայտնվել էր ՀՊՃՀ ռեկտոր Հովհաննես Թոքմաջյանի  ֆեյսբուքյան էջի անձնական ինտիմ նամակագրությունը: Ռեկտորը հայտարարել էր, թե իր էջը կոտրել են, նա հաղորդում էր ներկայացրել ոստիկանություն: Հարուցվել է քրեական գործ ՀՀ քրեական օրենսգրքի 254-րդ հոդվածի 1-ին մասով:

Ավելի ուշ Վլադիմիր Խոեցյանը ահազանգել էր, որ աշխատակազմի նորանշանակ ղեկավար Սամսոն Զատիկյանը գիշերը մտնում է վարչության աշխատակիցների սենյակներ և խուզարկում դրանք: