Փաստ ինֆո

Վաղը՝ նոյեմբերի 10-ին, կմեկնարկեն Ազգային ժողովի հերթական քառօրյա նիստերը, որոնց ընթացքում նախատեսվում է սկսել 2015թ-ի պետական բյուջեի և վերջինիս կատարումն ապահովող օրինագծերի քննարկումը:

Վերջիններիս թվում են, մասնավորապես, ՀՀ նվազագույն աշխատավարձի մասին օրենքում կառավարության կողմից առաջարկվող փոփոխությունները, համաձայն որոնց 2015թ-ի հուլիսի 1-ից Հայաստանում նվազագույն աշխատավարձի չափը նախատեսվում է սահմանել 55 հազար դրամ՝ ներկայիս 50 հազար դրամի փոխարեն:

Բացի այդ, հաստատվելիք օրակարգում կընդգրկվի նաև կառավարության կառուցվածքային փոփոխություններ նախատեսող օրինագիծը, որը  կքննարկվի հատուկ կարգով. երկրորդ ընթերցումը կիրականացվի նախագիծն առաջին ընթերցմամբ ընդունվելուց հետո՝ 24 ժամվա ընթացքում:

Ինչպես «Փաստինֆո»-ն ավելի վաղ տեղեկացրել էր, ավելի արդյունավետ կառավարման համակարգ ստեղծելու հիմնավորմամբ «Հայաստանի Հանրապետության կառավարության կառուցվածքի մասին» օրենքում փոփոխություն եւ լրացումներ կատարելու մասին նախագծով առաջարկվում է ՀՀ արտակարգ իրավիճակների նախարարությունը միացնել Տարածքային կառավարման նախարարությանը, ինչի արդյունքում այս երկու նախարարությունների փոխարեն կձևավորվի մեկ՝ Տարածքային կառավարման և արտակարգ իրավիճակների նախարարություն:

Բացի այդ, նախատեսվում է կառավարության կառուցվածքը համալրել նոր՝ ՀՀ միջազգային տնտեսական ինտեգրման և բարեփոխումների նախարարությամբ:

Կատարվելիք այս փոփոխությունների արդյունքում կառավարությունը կունենա հետևյալ կառուցվածքը.

1) աշխատանքի և uոցիալական հարցերի նախարարություն,

2) առողջապահության նախարարություն,

3) արդարադատության նախարարություն,

4) արտաքին գործերի նախարարություն,

5) բնապահպանության նախարարություն,

6) գյուղատնտեuության նախարարություն,

7) էկոնոմիկայի նախարարություն,

8) էներգետիկայի և բնական պաշարների նախարարություն,

9) կրթության եւ գիտության նախարարություն,

10) մշակույթի նախարարություն,

11) պաշտպանության նախարարություն,

12) սպորտի և երիտաuարդության հարցերի նախարարություն,

13) սփյուռքի նախարարություն,

14) տարածքային կառավարման և արտակարգ իրավիճակների, նախարարություն,

16) տրանuպորտի և կապի նախարարություն,

17) քաղաքաշինության նախարարություն,

18) ֆինանuների նախարարություն,

19) Հայաստանի Հանրապետության կառավարության աշխատակազմի ղեկավար-նախարար,

20)  ՀՀ միջազգային տնտեսական ինտեգրման և բարեփոխումների նախարարություն:

Նշենք, սակայն, որ չի բացառվում, որ հետագայում կառավարությունն իր կառուցվածքում այլ փոփոխություններ ևս նախաձեռնի: Մասնավորապես, ՀՀ վարչապետ Հովիկ Աբրահամյանն օրերս լրագրողներին հայտնել էր. «Մենք պետք է աստիճանաբար օպտիմիզացնենք կառավարման համակարգը, որովհետև 19 նախարարությունը Հայաստանի համար շատ է, քայլեր ենք կատարելու դրանց վերամիավորման համար: Դա արդյունավետ է մի քանի առումներով՝ վարչարարության, ֆինանսական միջոցների տնտեսման և, ամենակարևորը, աշխատանքի արդյունավետության: Եվ արտակարգ իրավիճակների ու տարածքային կառավարման նախարարությունը մենք ապագայում տեսնում ենք, որ լինի ներքին գործերի նախարարություն, ինչպես բազմաթիվ եվրոպական երկրներում: Դրա մեջ կմտնեն բազմաթիվ ծառայություններ, դա ճիշտ է, արդյունավետ է, և դա է ցույց տալիս աշխարհի փորձը»: