Փաստ ինֆո

Քրեական դատավարության հին, այն է՝ գործող  օրենսգրքով հնարավոր չէ առաջ գնալ, կարելի է միայն մնալ նույն տեղում: Այս մասին «Փաստինֆո»-ի թղթակցին հայտնեց փաստաբան Հայկ  Ալումյանը՝  ընդգծելով, որ գործող օրենսգրքում կատարված ահռելի քանակությամբ փոփոխությունների արդյունքում առկա են մեծ թվով ներքին հակասություններ: «Պարզապես մենք մեկ տարի-տարիուկես հաշտվում ենք հակասությունների, օրենսգրքի հետ այն պատճառով, որ ասում ենք՝  շուտով նոր օրենսգիրք է ընդունվելու»,- ասաց փաստաբանը: 

Հայկ Ալումյանը հայտարարեց, որ մեծ ջանքեր չեն պահանջվում գործող օրենսգրքում հակասությունները գտնելու համար. «Հինգ րոպեում  10-15  հակասություն կարող եմ Ձեզ ցույց տալ, ոչ թե հակասություններ, որոնց մասին պետք է մտածել, այլ ուղիղ հակասություններ»: 

Փաստաբանը նշեց, որ եթե նույնիսկ Քրեական դատավարության նոր կոնցեպցիան, լրիվ նոր մոտեցումները ու նոր օրենսգիրքը չլինեին, գործող Քրեական դատավարության օրենսգիրքը,  միևնույն է, պետք է զրոյից նորից գրվեր: Դրանում   գլուխները գլուխներին,  հոդվածները հոդվածներին ու նույն  հոդվածի  մի մասը  հակասում է մյուս մասին: «Կատարյալ  խայտառակություն են ընդհանրապես Վերաքննիչ դատարանի հետ կապված կանոնակարգումները, միայն այդ գլխում կգտնեք 10-15  կոպիտ հակասություններ»: 

Խայտառակություն է նաև նոր երևան եկած կամ նոր հանգամանքները կանոնակարգող գլուխը: «Վճռաբեկ բողոք ներկայացնելու հետ կապված այնպիսի հիմարություններ են  գրված, որ՝  եթե ես վճռաբեկ բողոքում  մատնանշում եմ Վճռաբեկ դատարանի նախկինում կայացրած որոշումը, Վճռաբեկ դատարանին պարտավոր եմ ներկայացնել իր իսկ կայացրած որոշումը, որ ինքը համոզվի, որ ինքն այդպիսի որոշում կայացրել է: Հիմարությունների մի կույտ»,- նշեց Հայկ Ալումյանը: Ոչ նոր օրենսգիրքն  են ընդունում, ոչ խայտակությունը վերացնում, եթե մի քիչ էլ տևի, սա արդեն կվերածի կոլլապսի:   

«Եթե արդեն հստակ որոշվել է, որ ՀՀ քրեական դատավարության նոր օրենսգիրքը պետք է ընդունվի, ապա ձգձգումները պարզապես անիմաստ են: Արդեն քայլը արվել է, կես ճանապարհն անցել են,   արդեն ուշ է կասկածելու համար»,- ասաց Հայկ Ալումյանը՝  ներկա իրավիճակը համեմատելով լարի վրա կես ճանապարհն անցած  լարախաղացի կասկածների հետ՝  վախենալ, հետ դառնալ, թե առաջ գնալ: