Փաստ ինֆո

«Քննչական գործողությունների մասնակիցներին իրենց պարտկանությունները չբացատրելը այն էական խախտումը չէ, որ պետք է հիմք դառնա արձանագրությունն անթույլատրելի ճանաչելու համար»,- Վարդան Պետրոսյանի գործով դատական նիստում այսօր հայտարարեց գործով մեղադրող դատախազ, Կոտայքի մարզի դատախազի տեղակալ Արթուր Սարգսյանը` հայտարարելով, որ Նիկոլայ Բաղդասարանի միջնորդությունը ձևական բնույթի է:

Այսպիսով, դատախազը միջնորդեց մերժել Վարդան Պետրոսյանի պաշտպանների ներկայացրած միջնորդությունը` գործին կցված ապացույցներն անթույլատրելի ճանաչելու վերաբերյալ, քանի որ, դատախազի խոսքով, «օրենքը նախատեսում է անթույլատրելի ճանաչել էական խախտումները», մինչդեռ ինքը «նշված խախտումները որպես այդպիսիք չի տեսնում»:

Ինչ վերաբերում է դեպքի վայրի զննության արձանագրության տակ ստորագրած ընթերակային, որին չի հաջողվում հայտնաբերել, ապա դատախազը հաստատեց պաշտպանի այն միտքը, թե «նման տվյալներով մարդ, իսկապես չկա», բայց և հիշեցրեց, թե քննչական գործողության մյուս մասնակիցները իրենց ցուցմունքներում հայտնել են, որ այդ 2-րդ ընթերական ներկա է եղել:  Դատախազը նաև հավելեց, թե վթարից հետո դեպքի վայրում շատ խառը իրավիճակ է եղել և չի բացառվում, որ ընթերական այլ անուն-ազգանունով է ներկայացել, քննիչն էլ ուշադրություն չի դարձրել:

Իսկ տուժողների շահերի ներկայացուցիչ Ռուբեն Բալոյանը որեւէ  կարծիք չհայտնեց Վարդան Պետրոսյանի պաշտպանների միջնորդության կապակցությամբ` պատճառաբանելով, որ հնարավոր չէ նման սեղմ ժամկետում դիրքորոշում հայտնել: Փոխարենը նա դատարանին միջնորդեց 20 օր ժամանակ տրամադրել` պաշտպանական կողմի ծավալուն միջնորդության մեջ նշված բոլոր փաստերը անձամբ ստուգելու համար:

Վարդան Պետրոսյանի պաշտպանները դեմ չէին միջնորդության ուսումնասիրության համար հակառակ կողմին ժամանակ տրամադրելուն, բայց ոչ` 20 օր: Փաստաբան Ջաղինյանն էլ դրանում դատավարությունն անհարկի ձգձգելու միտում տեսավ:

Ինքը` Վարդան Պետրոսյանը 20-օրյա ժամկետի մասին որևէ դիրքորոշում չհայտնեց` այն թողնելով դատարանի հայեցողությունը, սակայն հիշեցրեց, որ ինքը գտնվում է «Նուբարաշեն» ՔԿՀ-ում տուժողների նամակի հիման վրա, քանի որ վերջիններս իր` «Դատապարտյալների հիվանդանոց»-ում գտնվելու մեջ արտոնյալ պայմաններ էին տեսել: «Ձեզ ուզում եմ հավատացնել, որ ես կալանքը կրում եմ լուռ, անտրտունջ, այնպես, որ  ես ինքս ինձ հարգում եմ այդ կալանքում, և միայն ու միայն Ձեր հայեցողությանն եմ թողնում: Եթե Դուք գտնեք 20 օր, կլինի 20 օր, եթե 1 տարի, կլինի 1 տարի, եթե 10 կամ 3 օր, կլինի 3 օր: Սա ինձ համար ոչ մի նշանակություն չունի: Ինձ համար կարևոր է, որ լինի օբյեկտիվ որոշում»,- ասաց Վարդան Պետրոսյանը:

Այդուհանդերձ, դատարանը որոշեց գործի քննությունը հետաձգելու մասին Ռուբեն Բալոյանի միջնորդությունը բավարարել մասնակի` հաջորդ դատական նիստը նշանակելով 12 օր հետո` նոյեմբերի 19-ին: Փոխարենը այդ շաբաթվա ընթացքում կկայանա միանգամից 3 դատական նիստ` ամսի 19-ին, 20-ին և 21-ին: