Փաստ ինֆո

Այսօր Երևանի Կենտրոն ու Նորք-Մարաշ վարչական շրջանների դատարանում նշանակված էր նույն դատարանի շենքի դիմաց բողոքի ակցիա անցկացրած քաղաքացի Հայկ Կյուրեղյանի դեմ գործով առաջին դատական նիստը:

Սակայն պարզվեց, որ ամբաստանյալի պաշտպան Արա Զաքարյանը չի ներկայացել դատական նիստին: Ամբաստանյալը հայտարարեց, որ ինքը չի առարկում, որ դատական նիստն անցկացվի նրա բացակայությամբ: Սակայն գործով նախագահող դատավոր Արմեն Բեկթաշյանը պարզաբանեց, որ նույնիսկ իր պաշտպանից հրաժարումը պետք է տեղի ունենա պաշտպանի ներկայությամբ, ուստի դատական նիստ տեղի ունենալ չի կարող:

Ի դեպ, պաշտպան Արա Զաքարյանը «Փաստինֆո»-ի թղթակցին հայտնել էր, որ ինքը պայմանագիր չունի Հայկ Կյուրեղյանի պաշտպանությունը նաև դատարանում իրականացնելու համար:

Դատարանը դատական նիստը հետաձգեց մինչև դեկտեմբերի 1-ը:

Նշենք, որ Հայկ Կյուրեղյանին դատական նիստին ներկա մարդիկ, այդ թվում՝ Շանթ Հարությունյանի ու մյուսների գործով հարազատներ, հանրության ներկայացուցիչներ դիմավորեցին «հերոս» բացականչություններով: 
 
Դատարանի՝ դատական նիստերի դահլիճ գալուց հետո ամբաստանյալը ոտքի չկանգնեց՝ պատճառաբանելով, որ «ինքնակոչ դատարան է», «ՀՀ դատարան չէ, ռեժիմի դատարան է»: Ըստ ամբաստանյալի` 90 տոկոս դեպքերում ոչ թե արդարադատություն է իրականացվում, այլ` արդարության բռնաբարում: «Արդարադատություն իրականացնող մարմին չէ, դրա համար էլ չեմ հարգում այդ մարմինը»,- ասաց Հայկ Կյուրեղյանը:

Ըստ  մեղադրանքի` Հայկ Կյուրեղյանը, 2014թ. հունիսի 12-ին (Շանթ Հարությունյանի և մյուսների դատավարության առաջին նիստի օրը) Երևանի Կենտրոն և Նորք-Մարաշ վարչական շրջանների ընղհանուր իրավասության դատարանի շենքի առջևի հատվածում բողոքի ակցիա իրականացնող քաղաքացիների շարքում, «կոպիտ կերպով խախտելով հասարակական կարգը հասարակության նկատմամբ դրսևորել է բացահայտ անհարգալից վերաբերմունք՝ իր անկախությունը՝ հասարակության մեջ ընդունված վարքագծի կանոններից շեղելու, ինչպես նաև իր անձը հասարակությանը հակադրելու՝ իր գերակայությունն ի ցույց դնելու մղումով» բարձրացել է դատարանի շենքի առջևի ավտոկայանատեղիում կայանված  «Միցուբիշի Պաջերո» մակնիշի ավտոմեքենայի տանիքին:

Ապա անտեսելով տարածքում ծառայություն իրականացնող ոստիկաններին` քայլել է մեքենայի տանիքի վրայով և դիտավորությամբ վնասել այն՝ մեքենայի տիրոջը պատճառելով 284.000 ՀՀ դրամի գույքային վնաս, աղմկել է ու բռնություն գործադրել. որպես զենք օգտագործվող առարկայով՝ իր մոտ պահվող «Մակարով» տեսակի օդամղիչ ատրճանակով կրակոցներ է արձակել տարածքում ծառայություն իրականացնող, իշխանության ներկայացուցիչներ հանդիսացող, ՀՀ ոստիկանության ծառայողներ Արմինե Գրիգորյանի, Սամսոն Ղարիբյանի, Միքայել Այվազյանի և Արտաշես Նիկողոսյանի ուղղությամբ և դիտավորությամբ նրանց առողջությանր պատճառել թեթև վնասի հատկանիշներ չպարունակող վնասվածքներ:

Այնուհետև, տեսնելով իրեն մոտեցող ոստիկաններին՝ «սպառնացել է իրեն մոտենալու դեպքում ձեռքում եղած պլաստմասե առարկայով պայթեցնել մարդկանց հոծ բազմության կողքին կայանված ավտոմեքենան, ապա շարունակելով անհնազանդ վարքագիծը և չենթարկվելով իշխանության ներկայացուցիչ հանդիսացող՝ ՀՀ ոստիկանության Երևան քաղաքի վարչության ՊՊԾ գնդի 1-ին դասկի 2-րդ վաշտի հրամանատար Արայիկ  Աբելյանի՝ ավտոմեքենայի տանիքից իջնելու օրինական պահանջին և տեսնելով նրա ձգտումը՝ ֆիզիկական ուժի գործադրմամբ խափանելու իր գործողությունները, կապված վերջինիս կողմից իր ծառայողական պարտականությունների կատարման հետ, նրա կյանքի և առողջության համար վտանգավոր բռնություն գործադրելով՝ հիշյալ ատրճանակով կրակել է Ա.Աբելյանի ուղղությամբ և դիտավորությամբ վերջինիս առողջությանը պատճառել է թեթև վնաս՝ առողջության կարճատև քայքայումով՝ ճակատի աջ կեսի սալջարդ վերքի ձևով, իր այդ դիտավորյալ գործողություններով շուրջ 5 րոպե տևողությամբ անհարմարություն պատճառելով տարածքում գտնվող հասարակության անդամներին»։