Փաստ ինֆո

Գյումրիի «հակամարտության» գործով ամբաստանյալ, Գյումրիի նախկին քաղաքապետի եղբորորդի Վահե Ղուկասյանի պաշտպան Հայկ Ալումյանի վերաքննիչ բողոքն այսօր քննվեց մեկ դատավորի մասով նոր կազմով:

Գործը քննող դատական կազմում փոփոխություն է տեղի ունեցել. դատավորի համար սահմանված տարիքը լրացած լինելու հիմքով դատավորի գործունեությունը դադարեցրած Եվա Դարբինյանի փոխարեն դատարանի կազմում ընդգրկվել է Վերաքննիչ քրեական դատարանի դատավոր Սերգեյ Չիչոյանը:

Վահե Ղուկասյանի պաշտպան Հայկ Ալումյանն ամբողջությամբ պնդեց իր վերաքննիչ բողոքը՝ հարկ չհամարելով նորից նույն ծավալով ներկայացնել 26 թերթ կազմող իր վերաքննիչ բողոքը, սակայն նորից անդրադարձավ իր բողոքի հիմնական փաստարկներին:

Մասնավորապես, ըստ պաշտպանի՝ անտրամաբանական ու անհիմն է մեղադրող կողմի պնդումը, թե Վահե Ղուկասյանը շրջել է Գյումրիի փողոցներով՝ գործով տուժող Հարություն Խաչատրյանին գտնելու ու սպանելու համար:

Նշենք, որ առաջին ատյանի դատարանի դատավճռում էլ արձանագրվում է՝ «գործով չպարզված շարժառիթով»: Ըստ պաշտպանի՝ կարիք չկար տուժողին փողոցներով փնտրել. նրա  բնակության վայրը բոլորին հայտնի էր:

Ըստ պաշտպանական կողմի՝ այդ հանգամանքը ժխտվում է ամբաստանյալի ցուցմունքով և հերքվում գործի նյութերով՝ ամբաստանյալը հանդիպման մասին պայմանավորվել էր մի մարդու հետ, հանդիպել նրան, ապա նրան իր մեքենայով «հասցրել գործի տեղ»:

Պաշտպանական կողմը վիճարկում է նաև մեղադրող կողմի ու դատարանի պնդումը, թե առաջինը Վահե Ղուկասյանն է կրակել՝  առաջինը հակառակ կողմն է կրակել:

Առաջին ատյանի դատարանն անարժանահավատ է համարել վերջինի մասին վկայող թվով 7 վկաների դատաքննական ցուցմունքները՝ առանց վերլուծելու, առանց հիմնավորելու, զուտ պիտակավորելով վկաներին, ովքեր, ըստ դատարանի, «իրենց հովանավորության տակ են վերցնում Վահե Ղուկասյանին»:

Պաշտպանական կողմը վիճարկում է նաև այն, որ շատերի կյանքի համար վտանգավոր եղանակով Հարություն Խաչատրյանին ապօրինաբար դիտավորությամբ կյանքից զրկելու փորձի մեղադրանքի հիմքում դրվել է վերջինիս դստեր երկրորդ ցուցմունքն առ այն, որ ինքը դեպքի ժամանակ գտնվել է հոր կողքին, մինչդեռ դեպքից անմիջապես հետո վկան հայտնել էր, որ ինքը գնում էր խանութ, երբ սկսվեցին կրակոցները:

Պաշտպանական կողմը գտնում է նաև, որ Հարություն Խաչատրյանի մարմնում գնդակի մեկ կտորը հայտնվել է հետացատկի հետևանքով:

Առաջին ատյանի դատարանի դատավճռով 17 տարվա ազատազրկման դատապարտված Վահե Ղուկասյանի պաշտպանը միջնորդեց իր պաշտպանյալին  առաջադրված մեղադրանքի երեք հոդվածներից երկուսում՝ ՀՀ քրեական օրենսգրքի 104-րդ հոդվածի 1-ին մասով՝ սպանություն, 34-104-րդ հոդվածի 2-րդ մասի 6-րդ կետով՝ շատերի կյանքի համար վտանգավոր եղանակով սպանության փորձ, նրան ճանաչել անմեղ, իսկ ՀՀ քրեական օրենսգրքի 235-րդ հոդվածի 1-ին մասով՝ ապօրինի զենք կրելը, նշանակել առավել մեղմ պատիժ:

Մեղադրող կողմն իր հերթին խնդրեց մերժել բողոքը և ուժի մեջ թողնել առաջին ատյանի դատարանի դատավճիռը՝ պնդելով  մեղադրանքը:

Մասնավորապես, Հարություն Խաչատրյանի դստեր ցուցմունքների մասով մեղադրողը նշեց, որ վկան առաջին անգամ ընդհանուր է շարադրել, իսկ երկրորդ անգամ ավելի մանրամասն է նկարագրել դեպքը:

Հայկ Ալումյանը հայտարարեց, որ մեղադրողը աղավաղված է ներկայացնում իր բողոքի փաստարկներն ու հիմքերը: Նա ընդգծեց, որ պաշտպանական կողմը հնարավորություն չի ունեցել դատարանում հարցաքննել հիշյալ վկային՝ տուժողի դստերը, և նրա ցուցմունքների միջև հակասությունը մնացել է չպարզաբանված:     

Հաջորդ դատական նիստում բողոքի քննությունը կավարտվի, և Վերաքննիչ դատարանը, ըստ ամենայնի, կհեռանա խորհրդակցական սենյակ՝ որոշում կայացնելու:   

Հիշեցնենք՝ ըստ մեղադրանքի` Վահե Ղուկասյանը 2013թ ապրիլի 23-ի առավոտյան ապօրինի կերպով ձեռք բերված և իր մոտ պահվող հրազենով փորձել էր շատերի կյանքի համար վտանգավոր եղանակով ապօրինաբար դիտավորությամբ կյանքից զրկել Հարություն Խաչատրյանին, սակայն իր կամքից անկախ հանգամանքներով չէր կարողացել հանցագործությունն ավարտին հասցնել, այնուհետև ապօրինաբար, դիտավորությամբ կյանքից զրկել էր Արտյոմ Կարապետյանին, ով Գյումրիում առավել հայտնի է «Շեկո» մականունով։ Զինված միջադեպը տեղի էր ունեցել «Քավոր Հարութ»-ի` Հարություն Խաչատրյանի տան մոտ։