Փաստ ինֆո

Ֆինանսների փոխնախարար Պավել Սաֆարյանը, «Փաստինֆո»-ի հարցին ի պատասխան, հերքեց օրերս մամուլում տեղ գտած տեղեկություններն այն մասին, որ Հայաստան եկող տրանսֆերտների աճ է արձանագրվել: «Ինչպե՞ս կարող է նման բան լինել»,- մեր հարցին զարմանքով արձագանքեց փոխնախարարը` հավելելով, որ դրանց ծավալը մնացել է նույն՝ 20 մլն-ի սահմաններում:

Ֆինանսների փոխնախարարից հետաքրքրվեցինք նաև`արդյոք հաշվարկվե՞լ են Ռուսաստանի նկատմամբ կիրառված տնտեսական պատժամիջոցների հնարավոր ազդեցությունները մեր երկրի տնտեսության վրա` հաջորդ տարվա բյուջեի նախագիծը կազմելիս:

«Մինչև այսօր Ռուսաստանի վրա այն ազդեցությունները, որ եղել են, արտացոլված են մեր բյուջեի 4.1 % իրական աճում, հետագայում ինչ փոփոխություններ տեղի կունենան` դրական, թե բացասական, դժվար է գնահատել»,- ասաց փոխնախարարը` հավելելով, որ հետագայում, երբ դրանք կգնահատվեն, թվերը կճշգրտվեն:

Պավել Սաֆարյանին հիշեցրեցինք, որ կառավարության վերջին նիստում վարչապետ Հովիկ Աբրահամյանը հրահանգել էր բոլոր գերատեսչություններին գործարարներին ներկայացնել ու նախապատրաստել հունվարից 1-ից` ԵՏՄ անդամակցությունից հետո սպասվող փոփոխություններին:

«Հնարավո՞ր է, որ այս փոփոխություններն այնքան կտրուկ լինեն, որ անհրաժեշտություն առաջանա հենց տարեսկզբին փոփոխություններ կատարել նաև գլխավոր ֆինանսական փաստաթղթում»,- հարց ուղղեցինք մեր զրուցակցին:

«Եթե օրենքով սահմանված կարգով կառաջնա լրացուցիչ ծախսեր կամ լրացուցիչ եկամուտներ, իհարկե, բյուջեի փոփոխություն, օրենքով սահմանված կարգով, տեղի կունենա»,- ասաց ֆինանսների փոխնախարարն ու հավելեց. «Ցանկացած դեպքում` դա կլինի ԵՏՄ, կլինի այլ հանգամանք, բոլոր դեպքերում կառավարութունն ունի նման  պարտավորություն, որ ամրագրված է բյուջետային համակարգի մասին օրենքով»:

Լուսանկարը՝ Armenpress-ի