Փաստ ինֆո

«Պետության համար կարեւոր չէ, թե ով ինչ ընկերության հետեւում է կանգնած»,- ԱԺ-ում լրագրողներին հետ ճեպազրույցում հայտարարեց Տնտեսական մրցակցության պաշտպանության պետական հանձնաժողովի նախագահ  Արտակ Շաբոյանը` անդրադառնալով ապրանքային տարբեր շուկաներում և մասնավորապես շաքարավազի շուկայում գերիշխող դիրք գրավող Սամվել Ալեքսանյանին պատկանող ընկերությունների նկատմամբ հատուկ վերաբերմունքի մասին լրագրողների հարցերին:

ԶԼՄ ներկայացուցիչները հետաքրքրվեցին նաև, թե հակամրցակցային իրավիճակ չի՞ ստեղծվում արդյոք, երբ Սամվել Ալեքսանյանի հետ շաղկապված ընկերությունը տարեկան մոտ 5000 տոննա շաքարավազ է ներկրում Հայաստան, որը սահմանի վրա 943 դոլար արժեքով է մաքսազերծվում` շուկայից դուրս թողնելով մնացած ներմուծողներին:

«Տնտեսվարողի ներկայացրած փաստաթղթերի համաձայն՝ հիմնականում մեծ չափով շաքարավազի հումք է ներկրվում, արտադրություն է տեղում կազմակերպվում, և, բնականաբար, տեղական արտադրությունն ավելի էժան է նստում, քան ներկրվածը»,- ասաց Արտակ Շաբոյանը` տեղեկացնելով նաև, որ այսօր շաքարավազի շուկայի 99 տոկոսը պատկանում է «Ալեքս Գրիգ» ընկերությանը, իսկ մնացած 1 տոկոսը` ներմուծող փոքր ընկերություններին:

«Եթե մի շուկայում կա խոշոր ընկերություն, որը մեծ մասնաբաժին ունի, դա դեռևս խնդիր չէ ո՛չ մեր երկրում, ո՛չ ամբողջ աշխարհում: Խնդիրը չարաշահումների մեջ է: Ձեզ մտահոգում է հարցը, թե ինչո՞ւ է մի ընկերության պատկանում: Կան ոլորտներ, շուկաներ, որոնցում խոշոր ընկերությունների առկայությունը օբյեկտիվ գործոն է»,- ասաց Արտակ Շաբոյանն ու պարզաբանեց. «Հայաստանը փոքր երկիր է, շուկաները սահմանափակ են, շատ ապրանքներ ներմուծվում են միջազգային շուկաներից, խոշոր արտադրողներից: Այդ ապրանքները պետք է նորմուծվեն խոշոր խմբաքանակներով, դա գնանշվում է միջազգային բորսայում, Լատինական Ամերիկայի երկրներից են ներմուծվում: Այն ընկերությունները, որոնք կարողանում են մեծ խմբաքանակով ձեռք բերել միջազգային շուկաներից և ներմուծել, իրականացնել այդ տրանսպորտային ծախսերը, բնականաբար այդ խոշոր ընկերությունները մրցակցային առավելություն են ստանում: Փոքր ընկերություններն այս դեպքերում օբյեկտիվորեն չեն կարող խոշորի հետ մրցակցել»,- ասաց ՏՄՊՊՀ նախագահը: