Փաստ ինֆո

«ՀՀ 775 000 քաղաքացի այս պահին դիմել է 45 երկրների իշխանություններին` քաղաքացիություն ստանալու համար»,-այսօր ԱԺ-ում 2015թ. բյուջեի նախնական քննարկման ժամանակ հայտնեց ՀԱԿ խմբակցության պատգամավոր Արամ Մանուկյանը, երբ  Սփյուռքի նախարար Հրանուշ Հակոբյանն ավարտեց թվարկել Հայաստան-Սփյուռք համագործակցության ոլորտում հաջորդ տարի նախանշված միջոցառումների ցանկը:

Ի պատասխան Հրանուշ Հակոբյանը հայտնեց, որ իրենց ևս միգրացիայի խնդիրն անհանգստացնում է: «Աշխարհում այսօր 234 միլիոն մարդ միգրանտ է: Ասեմ, որ Եվրոպայում ծնված 80 մլն մարդ չի ապրում իր ծննդավայրում, ասեմ, որ միգրացիոն երևույթներն ակտիվացել են շատ տարբեր պատճառներով, և նույնը կա Հայաստանում»,- նշեց նախարարը:

«Տարբերությունն այն է, որ այդ 234 մլն-ը կազմում է աշխարհի բնակչության շատ ցածր տոկոսը, իսկ Հայաստանի բնակչության` չասեմ որ տոկոսը»,- արձագանքեց պատգամավորն ու հավելեց, որ աշխարոհւմ կատարված ուսումնասիրության համաձայն, ՀՀ-ից մեկնածների 75-80 %-ը չի վստահում և չի դիմում ՀՀ դեսպանատներին: «Ինչպե՞ս կարող եք աշխատել նրանց հետ, երբ նրանք ուղղակի չեն վստահում ու չեն դիմում մեզ»,- Հրանուշ Հակոբյանի պատասխանին արձագանքեց Արամ Մանուկյանը:

Ի դեպ, ՀԱԿ պատգամավորը նաև հետաքրքրվեց` տեղյակ է արդյոք Սփյուռքի նախարարը ՀՀ-ից արտագաղթի իրական թվին: «Ի՞նչ է նշանակում իրական, որևէ մեկը չի նստել հաշվում: Իրականն այն է, որը վիճակագրությունը տալիս է: Ես պետական պաշտոնյան եմ, պետական թվերն եմ բերում», ապա ավելացրեց. «Բոլոր հեռացողները չէ, որ դառնացած են հեռանում: Մեկը գնում է կրթության, մյուսը՝ աշխատանքի, մեկը՝ լավ ապագայի համար: 15-20 տարի գնացածներն արդեն մեր ակտիվիստներն են, գործընկերներն են, նաև տրանսֆերտներ ուղարկողները հենց նրանք են»: