Փաստ ինֆո

Ժամկետանց դեղերի հետ կապված վերահսկողության հարցում այսօր խիստ մոտեցում է որդեգրված և' դեղատներում, և' բուժհիմնարկներում: Այս մասին Ազգային ժողովի մշտական հանձնաժողովների այսօրվա համատեղ նիստում` 2015թ. պետական բյուջեի նախագծի նախնական քննարկումների ժամանակ, հայտնեց ՀՀ առողջապահության նախարար Արմեն Մուրադյանը:

«Օրինաց երկիր» խմբակցության անդամ Հովհաննես Մարգարյանը նկատեց, որ արդիական է նաև կեղծ դեղերի հարցը, քանի որ անգամ բժիշկներն են բողոքում, որ իրենց կողմից նշանակումները մի տեսակ աննպատակահարմար են դառնում, քանի որ հիվանդին չեն օգնում:

«Այստեղ մենք խնդիր ունենք ոչ միայն կեղծ դեղերայքի հետ, չգրանցված դեղորայքի հետ, ժամկետանց դեղորայքի հետ: Այս երեք ուղղություններն էլ չափազանց կարևոր են մեր երկրի համար»,-ընդգծեց նախարարը:

Ըստ նրա` դեղի իսկությունը, ժամկետանց լինելը կամ դրա պիտանելիությունը, որակը, կենսամատչելիությունը ապահովելու ուղղությամբ բոլոր գործողությունները անշուշտ պետական խիստ կարևորության ծրագրեր են, և պետությունը պետք է այդ ամբողջը հոգա ու գրանցումներով, մշտադիտարկումներով ապահովի դեղորայքի որակյալ և մատչելի լինելը իր շուկայում:

Ա.Մուրադյանը նշեց նաև, որ Հայաստանում տասնութ դեղարտադրող կա, որոնցից երկուսն ունեն միջազգային հավատարմագրում, և միայն հպարտությամբ կարելի է խոսել նրանց որակի մասին:

«Եթե արտադրողների համար դրոշմապիտակավորումը պարտադիր գործընթաց է, դնել մեր արտադրողներին ավելի վատ պայմաններում, քան ներկրողներին, իմաստազրկված է նաև տնտեսության զարգացման տեսանկյունից»,- հիմնավորելով ներմուծվող դեղորայքի դրոշմապիատակավորման անհրաժեշտությունը`ընդգծեց նախարարը:

Նա հավելեց նաև, որ երբ փորձ է արվում որպես հակափաստարկ հիմնավորել, թե  «դեղորայքի ներկրման շուկան գրեթե ամբողջովին «սպիտակ» շուկա է, այդ փաստեր ներկայացնողներն իրենք էլ շատ լավ հասկանում են, որ այդպես չէ և որոշ տոկոսով անշուշտ շուկայում կա, ներկրվում է սուրոգատ, կոնտրաֆակտ, որն իրենից ներկայացնում է ոչ լիարժեք դեղորայք, կեղծ դեղորայք, չհաշվառված դեղորայք»:

Ինչ վերաբերում է դրոշմապիտակավորման դեպքոււմ դեղերի գների բարձրացմանը, ապա, ըստ Ա.Մուրադյանի, Հայաստանի դեղորայքի ընդհանուր շուկան գնահատվում է 110 մլն ԱՄՆ դոլար: Դեղի միջինացված գինը երկու ԱՄՆ դոլարին համարժեք է, այսինքն` շուրջ 800 դրամ: Ըստ հաշվարկների` դրոշմապիտակավորման արդյունքում յուրաքանչյուր դեղի գինը կբարձրանա 2-5  դրամով:

«Եթե լինի դեղերի գների ոչ հիմնավորված բարձրացում, անշուշտ համապատասխան սուբյեկտներն ենթարկվելու են պատասխանատվության և պետք է հիմնավորեն գնի բարձրացումը»,-վստահեցրեց առողջապահության  նախարարը: