Փաստ ինֆո

Սյունիքի մարզպետ Սուրիկ Խաչատրյանի առանձնատան մոտ միջադեպի աղմկահարույց գործով այսօր շարունակվեց, սակայն չավարտվեց մարզպետի կնոջ, գործով տուժող ճանաչված  Լորետա Բարսեղյանի հարցաքննությունը: Գործով միակ ամբաստանյալը Արտակ Բուդաղյանն է, ով մեղադրվում է Սուրիկ Խաչատրյանի ու նրա հարազատների հասցեին սպանության սպառնալիքներ տալու մեջ: Ի դեպ, նա միջադեպի ժամանակ ծանր մարմնական վնասվածք է ստացել, իսկ նրա եղբայրը՝  Ավետիք Բուդաղյանը սպանվել է:

Արտակ Բուդաղյանի պաշտպան Հայկ Ալումյանի  հարցերի զգալի մասն առնչվում էր դեպքից հետո Սուրիկ Խաչատրյանի առանձնատան խոհանոցում տեղի ունեցած խոսակցության ձայնագրությանը՝  անգամ ընտանիքի անդամները  չեն իմացել, որ տեսախցիկը նաև ձայնագրում է և անկեղծացել են: Մասնավորապես, ձայնագրությունում խոսքը գնում  է նագանի մասին, որ գործում չկա, անօրինական զենքերի և  այլ հանգամանքների մասին, որոնք, ըստ  Հայկ Ալումյանի, կարող են լույս սփռել տեղի ունեցածի վրա:

Լորետա Բարսեղյանը հայտարարեց, որ հարցերը դուրս են  Արտակ Բուդաղյանի մեղադրանքի ծավալից: Հայկ Ալումյանն  առարկեց այդ դիտարկման մեջ՝  հարցերը լիարժեք առնչվում են են մեղադրանքի ծավալին, այն է՝  10 հատոր կազմող գործին, որն ամբողջությամբ նախաքննական մարմինն ուղարկել է դատարան: «Եթե 10 հատորն ուղարկել են դատարան, ուրեմն համարել են, որ 10 հատորն  էլ վերաբերվում է Արտակ Բուդաղյանի մեղադրանքին»,- ընդգծեց Հայկ Ալումյանը՝ հավելելով, որ մեղադրանքի կողմը  պարզապես փորձում է ձգձգել հարցաքննությունը, «այլ պատրվակ չեն գտնում»:

Դատարանն  էլ՝ դիմելով մեղադրանքի կողմին, մասնավորապես, մեղադրողին, նկատեց, որ դատարանում հետազոտվել է «ձեր ներկայացրած ապացույցը»՝ ձայնագրությունը և կողմերն իրավունք ունեն դրա շուրջ հարցեր տալ: «Մի խուսափեք ապացույցը  հետազոտելուց»,- ասաց գործով նախագահող դատավոր Նապոլեոն Օհանյանը: Իսկ Հայկ Ալումյանն էլ իր հերթին նշեց. «Մեկ ժամ է փորձում ենք համոզել Ռուբեն Սահակյանին, որպեսզի թույլ տա, որ  իր վստահորդը ցուցմունք տա», ինչին հետևեց Լորետա Բարսեղյանի սպասելի արձագանքը՝ «օգտվում եմ իմ սահմանադրական իրավունքից, չեմ պատասխանում ինձ ու իմ ընտանիքի  անդամներին առնչվող հարցերին»: Նա միաժամանակ  հավելեց՝  «չեմ հրաժարվում պատասխանել հարցերին»: Այնուամենայնիվ,  դատարանը արձանագրեց, որ տուժողը հրաժարվում է հարցերին պատասխանելուց:

Տուժողի մարտավարությունը քիչ անց որոշակի փոփոխություն կրեց, նա խոհանոցում տեղի ունեցած խոսակցության տարբեր հատվածների վերաբերյալ հարցերին սկսեց պատասխանել՝ «չեմ հիշում», «չեմ հիշում այդ պահին այնտեղ եղել եմ, թե ոչ» և այլն:

Ի պատասխան  պաշտպանական կողմի հարցին, թե «անձամբ Ձեզ ի՞նչ սպառնալիք է տվել Արտակ Բուդաղյանը»,  Լորետա Բարսեղյանի բնորոշմամբ՝  մահվան սպառնալիքը,  «իմ երեխայի, իմ ամուսնու նկատմամբ անձամբ ինձ է վերաբերվում»:

Տուժող կողմի ներկայացուցիչ Ռուբեն Սահակյանը պարբերաբար դժգոհում էր պաշտպանական կողմի հարցերից, դատարանի արձանագրումներից, նա դժգոհությամբ ընդունեց նաև պաշտպանական կողմի այն հայտարարությունը, թե իրենք Լորետա Բարսեղյանին տուժող են ասում չակերտների մեջ, որովհետև նրան տուժող չեն համարում: Ի պատասխան այդ դժգոհությանը, Հայկ Ալումյանը հայտարարեց՝ «Ես էլ չեմ համարում, որ Արտակ Բուդաղյանը հանցագործություն է կատարել, և մենք դա կապացուցենք»: