Փաստ ինֆո

ՀՀ ազգային վիճակագրական ծառայության միջազգային սահմանահատումների վերաբերյալ հրապարակած տվյալների հիման վրա կատարված վերլուծությունը ցույց է տալիս, որ 2014թ. հունվար-սեպտեմբեր ամիսներին միջազգային ուղևորահոսքերի բացասական մնացորդը` հանրապետությունից մեկնումների թվի գերազանցումը հանրապետություն ժամանումների թվին, նախորդ տարվա նույն  ժամանակահատվածի  համեմատ  պակասել  է 2,8 հազարով կամ 2,6 %-ով և կազմել 105,2 հազար մարդ: Այս մասին, մասնավորապես, նշված է ՀՀ սահմանահատումների ընթացիկ իրավիճակի մասին Տարածքային կառավարման նախարարության միգրացիոն պետական ծառայության այսօր հրապարակած տեղեկանքում:

Ըստ այդմ՝ 2014թ. հունվար-սեպտեմբեր ամիսներին ուղևորահոսքերի ընդհանուր ծավալը նախորդ տարվա նույն ժամանակահատվածի  համեմատ ավելացել է 472,2 հազար մարդով կամ 12,9%-ով և կազմել 4 մլն 140,5 հազար մարդ:

Օդային տրանսպորտով սահմանը հատած ուղևորների տեսակարար կշիռն ուղևորահոսքերի ընդհանուր ծավալում կազմել է 39,6%՝ նախորդ տարվա 35,7%-ի դիմաց:

Երրորդ եռամսյակում՝ հուլիս-սեպտեմբեր ամիսներին, միջազգային ուղևորահոսքերի բացասական մնացորդը կազմել է 19,3 հազար մարդ՝ նախորդ տարվա երրորդ եռամսյակի 13 հազարի դիմաց: Այսինքն՝ նախորդ տարվա համեմատ բացասական մնացորդն ավելացել է գրեթե 50 տոկոսով:

Ընդ որում՝ երրորդ եռամսյակում օդային և ավտոմոբիլային տրանսպորտով հանրապետությունից մեկնումների թիվը համապատասխանաբար  8 հազար 592-ով և 12 հազար 193-ով գերազանցել է հանրապետություն ժամանումների թվին:

Միջազգային ուղևորահոսքերի մնացորդը դրական է միայն երկաթուղային տրանսպորտով Հայաստանի սահմանը հատելու դեպքում՝ մեկնումների թիվը 1 հազար 483-ով զիջում է ժամանումների թվին: