Փաստ ինֆո

«Ես խնդրում  եմ` Ձեր չեղած գիտելիքները ցույց մի տվեք հանրությանը»,- Ազգային ժողովի մշտական հանձնաժողովների այսօրվա համատեղ նիստում` 2015թ. պետբյուջեի նախագծի նախնական քննարկումների ժամանակ, ԱԺ սոցիալական հարցերի մշտական հանձնաժողովի նախագահ, հանրապետական Հակոբ Հակոբյանը հորդորեց ԲՀԿ-ական պատգամավոր, տնտեսագիտության դոկտոր, պրոֆեսոր Միքայել Մելքումյանին:

Ի պատասխան` Մ.Մելքումյանը նույն խորհուրդը տվեց Հ.Հակոբյանին` ընդգծելով, թե «պետք չէ շատ ոգևորվել»:

Այս լեզվակռվին նախորդել էին ԲՀԿ-ական պատգամավոր-ՀՀ աշխատանքի և սոցիալական հարցերի նախարար Արտեմ Ասատրյան հարցուպատասխանն ու պատգամավորի արձագանքը, ինչից վրդովվել էր հանձնաժողովի նախագահը:

Մ.Մելքումյանը նախարարից մասնավորապես հետաքրքրվել էր, թե գործազրկության նպաստի տրամադրումից ակտիվ քաղաքականությանն անցնելու հետևանքով ինչպիսի՞ արդյունքներ են արձանագրվել: Նաև նշել էր, թե Հայաստանում գործազրկության վերջին պաշտոնական ցուցանիշը 18,6 տոկոս է, որը տարածաշրջանում ամենաբարձրն է:

Ի պատասխան` նախարար Ասատրյանը հիշեցրեց, որ 2014թ. համար ընդունվեց «Զբաղվածության մասին» նոր օրենք, որի հիմնական շեշտադրումն այն էր, որ պետք է իրականացվի զբաղվածության ակտիվ քաղաքականություն` պասիվ ծրագրերի փոխարեն:

Նաև նշեց, որ մինչև 2014թ. զբաղվածության ոլորտում իրականացվող ծրագրերի 95 տոկոսը նպաստների տրամադրումն էր և միայն 5 տոկոսը` զբաղվածության ակտիվ ծրագրեր:   

Ըստ նախարարի` 2014թ. 9 ամիսների տվյալներով՝ աշխատանքի է տեղավորվել 8 հազար 155 մարդ: Բացի այդ, գյուղատնտեսական նշանակության հողերի սեփականատեր և աշխատաշուկայում անմրցունակ համարվող` զբաղվածության կենտրոններում հաշվառված անձանց հետ առկա է 2 հազար 642 պայմանագիր:

Մ.Մելքումյանին նախարարի պատասխանը չգոհացրեց. «Որևէ ցուցանիշ Դուք չհնչեցրեցիք: Գործազրկության մակարդակը այժմ քանի՞ տոկոս է, երկրորդ`աղքատության մակարդակի առումով ևս պատասխան չհնչեց, որքա՞ն աջակցություն է տրամադրվում մեկ գյուղատնտեսական տնտեսությանը»:

Պատգամավորի արձագանքը մնաց անավարտ. նրա խոսքն ընդհատեց ԱԺ սոցիալական հարցերի մշտական հանձնաժողովի նախագահ, հանրապետական Հակոբ Հակոբյանը.«Ներողություն, ասենք, սոցապնախարարը ո՞նց կարող է պատասխանել, երբ որ այդ աջակցությունը գտնվում է բացարձակ այլ ոլորտում»:

ԲՀԿ-ական պատգամավորը հակադարձեց, թե իր հարցերը բխում են նախարարին ուղղված հարցերի պատասխաններից և հորդորեց. «Ես խնդրում եմ` Դուք, այդպես շատ կուրծք ծեծելով, շատ ոգևորված բան չանեիք այս առումով», ինչին հետևեցին «չեղած գիտելիքները» հանրությանը ցույց չտալու՝ Հ.Հակոբյանի հորդորն ու Մ.Մելքումյանի համանման փոխադարձ հորդորը:

Լուսանկարը՝ Ֆոտոլուրի