Փաստ ինֆո

«Խորն անհանգստացած ենք այս խնդրով»,- ասաց ԿԳ նախարար Արմեն Աշոտնյանը՝ անդրադառնալով պետական բուհերից երիտասարդ դասախոսների հեռանալու փաստին:

«Որպես կրթության նախարար՝ այս սպառնալիքը գնահատում եմ որպես մարտահրավեր` բուհական կադրերի երիտասարդացման հարցում, մասնավոր հատվածի հետ մեր ունեցած կապերի խնդիրն է վտանգի տակ դրվում և աշխատաշուկային միտված կրթական ծառայությունների արդիականացման հարցը՝ նույնպես»,- ասաց Արմեն Աշոտյանը:

Հիշեցնենք՝ պետական ու մասնավոր բուհերում միաժամանակ աշխատող երիտասարդ դասախոսները կառավարության ղեկավարին էին դիմել մտահոգությամբ, որ իրենց 2 աշխատավարձերից էլ նպատակային սոցիալական վճարներ են պահվում: Եվ քանի որ պետական բուհերում աշխատավարձն ավելի ցածր է, նրանք արդյունքում որոշում են հեռանալպետական բուհից:

Խնդրի հանրային հնչեղություն ստանալուց հետո վարչապետ Հովիկ Աբրահամյանը կառավարության՝ սեպտեմբերի 4-ի նիստում ֆինանսների նախարարին հանձնարարել էր կարգավորել երիտասարդ դասախոսներին նպատակային սոցիալական վճարից ազատելու հարցը: Բայց այս հանձնարարականից 2 ամիս անց նախարարությունում դեռ գործնական միջոցներ ձեռք չեն առնվել, իսկ երիտասարդ դասախոները շարունակում են հեռանալ բուհերից` նախընտրելով աշխատել մասնավոր գործատուի մոտ:

Ի դեպ, Արմեն Աշոտյանն այսօր ևս չթաքցրեց, որ ֆինանսների նախարարը հարցի լուծումը դեռ չի գտել:

«Ես այսօր խոսել եմ իմ գործընկերոջ հետ, նա ասաց, որ որոշակի տեխնիկական դժվարություններ կան՝ ծրագրային լուծում տալու համար, բայց լուծումն անպայման տրվելու է»,- ասաց ԿԳ նախարարը, ապա հավելեց. «Ես խսել եմ նաև ՏՀՏ մի շարք կազմակերպությունների հետ, նրանք էլ են սպասում խնդրի լուծմանը, որովհետև այն մասնագետները, որոնք իրենց մոտ են աշխատում ու զուգահեռ բուհերում, բայց հեռացել են բուհերից, պատրաստ են վերադառնալ բուհեր: Մենք մի քանի ամիս կորցնում ենք, բայց դե հուսով եմ, որ խնդիրը լուծում կստանա»:

Իսկ լուծումը, ըստ Աշոտյանի հետևյալն է. «մասնավոր կառույցներում և զուգահեռ բուհերում աշխատող երիատասարդները չպետք է նպատակային սոցիալական վճար տան այն աշխատավարձից, որն ստանում են մասնավոր հատվածից»: