Փաստ ինֆո

ՀՀ կառավարությունն այսօր հաստատեց Երևանում չինարենի խորացված ուսուցմամբ դպրոց հիմնելու նախագիծը: Իսկ ԿԳ նախարար Արմեն Աշոտյանը, կառավարության նիստից հետո «Փաստինֆո»-ի հարցին ի պատասխան, հայտնեց, որ դպրոցի շինարարությունը նախատեսվում է սկսել 2015թ. սկզբին և ավարտել շուրջ 1.5 տարուց: «Շինարարություն և գույքային բազային ապահովում` կարծում եմ շուրջ 2 տարի կտևի մինչև գնանք միասին դպրոց բացենք»,- ասաց նախարարն ու ավելացրեց. «Եթե ես էլ չլինեմ այդ օրը նախարար, խնդրում եմ հիշեք, որ այդ մասին այսօր խոսել ենք»:

Չինարենի խորացված ուսուցմամբ դպրոցը, ինչպես արդեն հայտնել ենք, կառուցվելու է Երևանի Քանաքեռ-Զեյթուն համայնքի Հ.Գյուլիքեխվյանի անվան N103 ավագ դպրոցի տարածքում` բացառապես չինացի մասնագետների կողմից և չինական կողմի գումարներով:

Դպրոցը լինելու է հայկական, բայց լրացուցիչ դասաժամերի հաշվին դրանում չինարեն լեզու և չինական մշակույթ է դասավանդվելու. տեղեկացրեց Արմեն Աշոտյանը, հավելելով, որ այն լինելու է Արևելյան Եվրոպայի և ԱՊՀ տարածաշրջանում խոշորագույնը:

Չինարենի պահանջարկ, ըստ Արմեն Աշոտյանի, կա ինչպես աշխարհում, այնպես էլ` Հայաստանում, ուստի նախարարը չի կասկածում, որ դպրոցը հաջողության հասնելու է:

Նշենք, որ չինարենի ուսուցումը դպրոցում նախնական փուլում իրականացվելու է ռուսական դասագրքերով, քանի որ, Արմեն Աշոտյանի խոսքով, հայերենի հենքով չինարենի դասագրքեր առայժմ չկան:

Ի դեպ, չինական դպրոցը միակը չէ: Կառավարությունը մտածում է առաջիկայում նաև պարսկերենի և ոչ միայն պարսկերենի խորացված ուսուցմամբ դպրոցներ հիմնելու մասին: «Մենք նմանատիպ նախագիծ առաջարկել ենք նաև մի շարք արաբական երկրների, այդ թվում և` Իրանին, որպեսզի իրենք էլ կառուցեն այստեղ հայերենի ուսուցման հիմքով, իրենց լեզուների խորացված ուսուցմամբ դպրոցներ, գնում են բանակցություններ մի շարք արաբական երկրների հետ»,- ասաց Արմեն Աշոտյանը: