Փաստ ինֆո

2,5 տարեկան Լիա Միսակյանի՝ «Արաբկիր» բժշկական համալիրում մահվան գործով այսօր ամբաստանյալ բժիշկ Լիլիթ Վարդանյանն իր ցուցմունքը սկսեց ցավակցական խոսքով և նշեց, որ արել է այն, ինչ  կաներ ցանկացած բժիշկ, եթե լիներ իր փոխարեն. «Իմ խիղճը հանգիստ է, ցավում եմ նման ելքի համար»:

Ըստ ամբաստանյալի, 2012թ. դեկտեմբերի 31-ին երեխան հիվանդանոց  ընդունվելիս  ունեցել է վիրուսային ախտանշաններ, ջերմել է,  կոկորդը կարմրած է եղել, իսկ շնչառությունը նորմալ է եղել, թոքաբորբի որևէ ախտանիշներ  չեն եղել, այդ պատճառով էլ ռենտգեն հետազոտություն չի նշանակել, իսկ երեխայի վիճակը գնահատել է ծանր,  քանի որ ջերմային ցնցումներ է ունեցել, և որ, անկախ անալիզների պատասխանից, միևնույն է Լիա Միսակյանը պետք է մնար բժիշկների հսկողության տակ:

Երեխային ամբաստանյալ բժիշկը նշանակել է ջերմիջեցնող, ներերակային կաթիլներ, քթի լվացում, ընդհանուր անալիզներ: Արդեն համայցի ժամանակ երեխան հանգիստ է եղել շնչառությունը՝ոչ ծանր, վստահեցնում է ամբաստանյալը:

Ինչ վերաբերում է անալիզների պատասխանների ուշ ստացմանը, ամբաստանյալը նշեց, որ  երեխայի արյան անալիզները շտապ ստանալու ցուցում չի եղել: Ըստ նրա, ԲՀ-ում գործող ընդունված կարգի համաձայն, անալիզները ստացվում են առավոտյան ժամերին,  եթե չկա դրանց պատասխանները շտապ ստանալու ցուցում, իսկ լաբորանտը իրեն բանավոր տեղեկացրել է, որ բոլոր անալիզները նորմալ են և շեղումներ չկան:

«Ես չեմ իմացել, որ արյան անալիզները վերցված չեն եղել և որ Լիայի անալիզները այդ անալիզների մեջ չեն եղել»,- ասաց ամբաստանյալը: Սա  առաջացրեց տուժողի իրավահաջորդի զայրույթը. «Երեխային բերում եմ, հանձնում եմ Ձեզ: Ո՞վ պետք է վերահսկի»:

Հունվարի 3-ին գալով աշխատանքի, բժիշկ Լիլիթ Վարդանյանը  պարզում է, որ Լիա Միսակյանը մահացել է: «Ես այդպես էլ չհասկացա, թե ի՞նչն է երեխայի մահվան պատճառը»,-ասաց ամբաստանյալ բժիշկը:

Ամբաստանյալը կարծել է, որ այդ հարցի պատասխանը կստանա դիակի դատաբժշկական փորձաքննությամբ, սակայն,  ըստ նրա, փորձաքննությունը նորմալ չի կատարվել:

Տուժողի իրավահաջորդը, ամբաստանյալին հարցեր տալիս, հայտարարեց, որ ամբաստանյալի ասածների 80 տոկոսը սուտ է, ինչին արձագանքեց նախագահող դատավորը, պարզաբանելով, որ ամբաստանյալը կարող է հրաժարվել ցուցմունք տալուց կամ տալ սուտ ցուցմունք:

Այստեղ էլ պաշտպանական կողմը հայտարարությամբ հանդես եկավ՝ նշելով, որ դատարանը կողմնակալ վերաբերմունք է դրսևորում և որ ամբաստանյալը ցանկանում է ցուցմունք տալ և ճիշտ ցուցմունք է տալիս, ինչո՞ւ է դատարանը շեշտում, թե կարող է սուտ ցուցմունք տալ:

Ամբաստանյալը, եզրափակելով իր ցուցմունքը, նշեց, որ երբևէ անփույթ ու անբարեխիղճ չի գտնվել:

Նշենք նաև, որ այսօրվա նիստում,  մինչև ամբաստանյալների հարցաքննությանն անցնելը, դատարանն ավարտեց ապացույցների հետազոտումը,  որտեղ մասնավորապես ռենտգեն հետազոտության արդյունքները և բժիշկների կողմից արված հետազոտությունները տրված  էին ռուսերեն լեզվով, ինչը արժանացավ և՛ պաշտպանական կողմի, և՛ դատարանի ուշադրությանը:  Դատավոր Լևոն Ավետիսյանն ընդգծեց, որ դա վարույթն իրականացնող մարմնի բացթողումն  է, և դատախազին պարտավորեցրեց ապահովել նշված փաստաթղթերը հայերեն լեզվով՝ գործի նյութերին կցելու համար: