Փաստ ինֆո

Պոռնկագրական նյութեր կամ առարկաներ տարածելու գործով առաջին դատական նիստն այսօր տեղի չունեցավ: Դատարանը՝ դատավոր Մեսրոպ Մակյանի նախագահությամբ, որոշեց դատաքննությանը ներգրավել թարգմանիչ՝ ռուսերենից հայերեն և հակառակը:

Միայն դատարանում՝ գործի նախապատրաստական փուլում, այսօր ուշադրություն դարձվեց այն հանգամանքի վրա, որ միջնակարգ ռուսական կրթություն ունեցող ամբաստանյալ Նիկոլայ Իվանյանը ոչ բավարար կամ գրեթե չի տիրապետում Հայաստանի պետական լեզվին՝ հայերենին:

«Շատ վատ եմ կարդում ու շատ վատ եմ գրում»,- ասաց ամբաստանյալը, ապա հավելեց, որ հասկանում է, սակայն վատ է արտահայտվում:

Սակայն, ինչպես պարզվեց հետագայում, ամբաստանյալը չի տիրապետում, այսինքն՝ չի հասկանում առնվազն իրավաբանական տերմինները՝ մասնավորապես, ըստ նրա, «բացարկը» նշանակում է «բացակայություն»:

Այդ պայմաններում նախաքննության ընթացքում թարգմանիչ չի ներգրավվել: Ամբաստանյալը կարծում էր, որ  թարգմանչի ծառայությունների համար ինքը պետք է վճարի. ըստ նրա՝ այդ մասին իրեն հայտնել են քննչական բաժնում:

Դատարանն ընդգծեց, որ պետությունը պարտավոր է հայերեն լեզվին չտիրապետելու դեպքում ապահովել թարգմանչի մասնակցությունը՝ պետբյուջեի միջոցների հաշվին:

Դատական նիստը հետաձգվեց, արդեն հաջորդ նիստից սկսած կապահովվի թարգմանչի մասնակցությունը:

53-ամյա Նիկոլայ Իվանյանին մեղադրանք է առաջադրվել՝ ՀՀ քրեական օրենսգրքի 263-րդ հոդվածի 1-ին մասով՝ Պոռնկագրական նյութեր կամ առարկաներ տարածելը:

Ըստ մեղադրանքի՝ նա իրացնելու նպատակով ձեռք է բերել պոռնկագրական նյութեր պարունակող թվով 17 հատ «Sublie M 5», «DEBAUCHES», «Fantastic», «WXTAZE», «EXTASY» տպագիր հրատարակություն հանդիսացող ամսագրեր, որոցում կոպիտ, գռեհիկ, նատուրալիստական ձևով մանրակրկիտորեն ցույց են տրվում սեռական ակտի անատոմիական, ֆիզիոլոգիական մանրամասները:

Ամսագրերից  մեկը, առևտուր կատարեու եղանակով, 2014թ. հունիսի 7-ին՝ ժամը 12:00-ի սահմաններում, Երևան քաղաքի Խանջյան փողոցում գործող «Վերնիսաժ» տոնավաճառում ապօրինի տարածել է` վաճառելով մի քաղաքացու: