Փաստ ինֆո

Պետական բյուջեն կազմելիս հաշվի են առնվում այն ծախսերը, որոնք իրավական հիմք ունեն: Եթե չկա իրավական հիմք, չի կարող լինել հաշվարկ և նախատեսված գումար: Այս մասին Ազգային ժողովի մշտական հանձնաժողովների՝ հոկտեմբերի 29-ի համատեղ նիստում` 2015թ. պետբյուջեի նախագծի նախնական քննարկումների ժամանակ, հայտարարեց ՀՀ Կենտրոնական ընտրական հանձնաժողովի նախագահ Տիգրան Մուկուչյանը` ի պատասխան «Ժառանգություն» խմբակցության անդամ Զարուհի Փոստանջյանի հարցի:

Ընդդիմադիր պատգամավորը, դիմելով ԿԸՀ նախագահին, ասել էր. «Պարոն Մուկուչյան, ինչպես գիտեք, եկող տարի սպասվում են արտահերթ խորհրդարանական և նախագահական ընտրություններ»: Ի պատասխան ԿԸՀ նախագահն անմիջապես արձագանքեց. «Անկեղծ ասած` չգիտեմ»:

Պատգամավորը շարունակելով իր հարցը՝ ԿԸՀ նախագահից հետաքրքրվեց, թե արդյոք պետբյուջեով գումար նախատեսվե՞լ է արտահերթ նախագահական և խորհրդարանական ընտրությունների համար, ինչը «հանրության ցանկությունն է», և որքա՞ն է այդ գումարը:

Տ.Մուկուչյանն ընգծեց, որ պատգամավորի մատնանշած հնարավոր ընտրությունների մասին ինքը տեղյակ չէ, իսկ ինչ վերաբերում է նրան, թե դրանք որքան կարժենան, խորհուրդ տվեց դիմել ԿԸՀ աշխատակազմի ղեկավարին` նախորդ համապետական ընտրությունների ծախսերը ճշտելու համար:

ԿԸՀ նախագահը, ներկայացնելով գալիք տարվա պետբյուջեով իր ղեկավարած հանձնաժողովի աշխատակազմի պահպանման ծախսերը, նշեց, որ, ինչպես պետական կառավարման ապարատի մյուս հիմնարկներում, այստեղ ևս չկան էական փոփոխություններ:

Ըստ էության,պահպանվել են 2014թ. ցուցանիշները, աճը պայմանավորված է բացառապես աշխատավարձերի բարձրացման խնդրով:

«Ընդհանուր պլանավորված նախնական թվի 80 տոկոսը վերաբերում է աշխատավարձերին, մնացածը` պահմանման ծախսերն են` սահմանված նորմատիվներին համապատասխան»,-հայտնեց Տ.Մուկուչյանը:

Ըստ նրա` հաջորդ տարի նախատեսված տեղական ինքնակառավարման մարմինների ընտրությունների հետ կապված՝ քվեարկության օրերն արդեն հաստատված են:

«Ընդհանուր առմամբ նախատեսվում է մոտ 150 համայնքներում  հերթական ընտրությունների անցկացում, որոնցից 6-ը` քաղաքային համայնքներ»,-հայտնեց նա` ընդգծելով. «Սա են այն աշխատանքները, որոնք պլանավորվել են և որոնց վերաբերյալ ես կարող եմ ձեզ տեղեկություն տրամադրել»:  

ԿԸՀ նախագահը հավելեց, որ եթե պատգամավորի կողմից մատնանշած «ընտրությունները սահմանված կարգով նշանակվեն, այն ժամանակ էլ, բնականաբար, Ընտրական օրենսգրքով սահմանված կարգով կիրականացվեն աշխատանքներ»: