Փաստ ինֆո

Բանդայի գործով այսօրվա նիստում ամբաստանյալ Արտուշ Հակոբյանի պաշտպան Հովիկ Արսենյանը հրապարակեց նախաքննության ընթացքում իր պաշտպանյալի դիմումներն՝ ուղղված երկրի գլխավոր դատախազին ու ոստիկանապետին՝ «ներկայացնելով հիմքեր՝ հետաքննող մարմնի դեմ քրեական գործ հարուցելու համար»:   

Ըստ այն ժամանակ մեղադրյալի՝ իր նկատմամբ ֆիզիկական ուժ է գործադրվել՝ շինծու ապացույցներ ձեռք բերելու նպատակով:

Մասնավորապես, ոստիկանները փորձել են իր ձեռքը խցկել Մակարով տեսակի ատրճանակ և գոտկատեղին ֆիքսել ՏՏ տեսակի ատրճանակ: Արդյունքում, ըստ մեղադրյալի, ատրճանակի վրա հայտնվել է Արտուշ Հակոբյանի բթամատի մատնահետքը, իսկ իր մեքենայում՝ Ասպիրինի շշի մեջ կանաչավուն զանգված:

Ավելին, ըստ նրա, իր մեքենան մի ամբողջ օր գտնվել է ինչ-որ մեկի մոտ, և այդ ինչ-որ մեկը «ինչ ասես կարող էր գցել մեքենայի մեջ»: Ըստ Արտուշ Հակոբյանի՝ հետաքննող մարմինը փորձել է իր հորը ներքաշել կաշառք տալու սադրանքի մեջ՝ խոստանալով զենքի վրայից մաքրել որդու մատնահետքը, հայրը սադրանքին չի արձագանքել:

«Նախաքննության ընթացքում թե՛ Արտուշ Հակոբյանի դիմումները, թե՛ պաշտպանական կողմի միջնորդություններն ուղղված են եղել օբյեկտիվ, լրիվ ու բազմակողմանի քննության կատարմանը, ինչը չի կատարվել ու խոտան վիճակում բերել, ներկայացրել են դատարան»,- ասաց պաշտպան Արսենյանը:

Դատարանը որոշեց դիմումները կցել գործին:

Դատարանում ևս Արտուշ Հակոբյանը հանդես եկավ իր դիմումների ոգով հայտարարությամբ՝ հետաքննող մարմնի աշխատողներին որակելով՝ «ո՛չ ոստիկան են, ո՛չ սովետական միլիցիոներ, «մուսոր են»:

Պաշտպանական կողմն այսօր հանդես եկավ մեծ թվով  ապացույցներ անթույլատրելի ճանաչելու միջնորդություններով՝ խուզարկության արձանագրություն, դատահետքաբանական, մատնադրոշմային, դատակենսաբանական, դատագենետիկական, միկրոմասնիկային, մանրաթելային փորձաքննությունների եզրակացություններ. դրանք, ըստ պաշտպանական կողմի, ձեռք են բերվել օրենքով սահմանված կարգի խախտմամբ:    

Ամբաստանյալ Սամվել Դավթյանի պաշտպան Կարեն Հակոբյանը միջնորդեց անթույլատրելի ճանաչել իր պաշտպանյալի՝ որպես կասկածյալ տված ցուցմունքը՝ ըստ պաշտպանի, այն ձեռք է բերվել խոշտանգումների ազդեցության տակ՝ Մարդու իրավունքների եվրոպական կոնվենցիայի, ՀՀ սահմանադրության ու Քրեական դատավարության օրենսգրքի դրույթների խախտմամբ:

Մեղադրող Սասուն Խաչատրյանը նշեց, որ Հատուկ քննչական ծառայությունում նյութեր են նախապատրաստվել Սամվել Դավթյանին խոշտանգումների ենթարկելու հայտարարության կապակցությամբ, դրանցով հիմնավորվել է, որ  վերջինս դիմադրություն է ցույց տվել, դրա  հետևանքով նրա նկատմամբ ֆիզիկական ուժ է գործադրվել:

Ամբաստանյալ Դավիթ Գալստյանի պաշտպան Ստեփան Ոսկանյանը ևս միջնորդեց անթույլատրելի ճանաչել իր պաշտպանյալի մասնակցությամբ տեղի ունեցած փորձարարությունները՝ օրենքով սահմանված կարգի խախտմամբ կատարված լինելու պատճառով, ինչպես նաև մի շարք այլ ապացույցներ՝ խոշտանգումների ազդեցության ներքո կատարված լինելու պատճառով:  

Դատարանը բոլոր միջնորդությունների վերաբերյալ որոշում կայացնելը հետաձգեց, դրանց դատարանը կանդրադառնա խորհրդակցական սենյակում՝  «ապացույցների լրիվ համադրման,  հետազոտման արդյունքում»:

Պաշտպանական կողմը միջնորդեց նաև նշանակել ձեռնոցների դատակենսաբանական և դատագենետիկական համալիր փորձաքննություն:

Կողմն առաջարկում է փորձետներին առաջադրել հարցեր, թե, մասնավորապես, ձեռնոցներում առկա՞ են մարդու կողմից թողնված կենսաբանական բնույթի հետքեր, դրանք արդյոք թողնվե՞լ են ամբաստանյալների կողմից:

Դատարանը հեռացավ խորհրդակցական սենյակ՝ միջնորդության վերաբերյալ որոշում կայացնելու:

Քիչ առաջ դատարանը հրապարակեց միջնորդությունը մերժելու վերաբերյալ իր որոշումը: