Փաստ ինֆո

2015թ. արտաքին տնտեսական հարաբերությունների զարգացմանը միտված միջոցառումներն ուղղված կլինեն տնտեսության մրցունակության բարձրացմանը և համաշխարհային տնտեսությանն ինտեգրման խորացմանը:

Անհրաժեշտ միջոցներ կձեռնարկվեն՝ Եվրամիության «Արտոնությունների ընդհանրացված և համալրված համակարգ» արտոնյալ առևտրային ռեժիմից օգտվելու շարունակականությունն ապահովելու ուղղությամբ, ինչպես նաև առանցքային շեշտադրում կկատարվի ՀՀ Եվրասիական տնտեսական միությանն անդամակցության քայլերի արդյունավետ իրականացման ապահովման ուղղությամբ:

Այս մասին Ազգային ժողովի մշտական հանձնաժողովների համատեղ նիստում այսօր մեկնարկած գալիք տարվա պետբյուջեի նախագծի նախնական քննարկումների ժամանակ իր ելույթում ասաց ՀՀ վարչապետ Հովիկ Աբրահամյանը:

Ֆինանսների փոխնախարար Պավել Սաֆարյանն էլ, ներկայացնելով «Հայաստանի Հանրապետության՝ 2015թ. պետական բյուջեի մասին» օրենքի նախագծի մշակման սկզբունքները, հայտնեց, որ կառավարությունն օբյեկտիվորեն չի կարողացել բյուջեի նախագծում արտացոլել Եվրասիական տնտեսական միությանը Հայաստանի անդամակցության հետևանքները:

Դա պայմանավորված է նախ այն հանգամանքով, որ գործադիրը բյուջեն պարտավոր էր ներկայացնել տարեսկզբից 90 օր առաջ, իսկ այն ժամանակ իրավական առումով համաձայնագիրը դեռևս ստորագրված չէր: Բացի այդ, ավարտված չէին մաքսատուրքերի հետ կապված բանակցությունները:  

Ինչպես լրագրողների հետ զրույցում ասաց Պ.Սաֆարյանը, կապված նրանից, թե մաքսատուրքերի հետ կապված ինչպիսի համաձայնություններ ձեռք կբերվեին, բնականաբար, դա էականորեն ազդելու էր Հայաստանի ՀՆԱ-ի, եկամտային սցենարի, գնաճի վրա ազդեցության գնահատականների վրա:

«Քանի որ այդ համաձայնություններն արդեն կայացել են, ես կարծում եմ, մեկ ամսվա ընթացքում ազդեցությունները գնահատելու այն գործիքակազմը, որին մենք տիրապետում ենք, հնարավորություն կտա համապատասխան գնահատականներ տալ»,- նշեց փոխնախարարը՝ հավելելով, որ, իրենց նախնական գնահատականներով, «թե՛ մեր եկամուտների, թե՛ մեր ՀՆԱ-ի աճի վրա դրական ազդեցություն է ունենալու»:

Հարցին, թե կոնկրետ ի՞նչը կբերի դրական փոփոխությունների, Պ.Սաֆարյանն ասաց. «Մենք վստահաբար գիտենք, որ բյուջեի եկամտային մասն ավելանալու է՝ մաքսատուրքերի բարձրացման հաշվին»:

Ի պատասխան հարցի, թե կա՞ արդյոք կանխատեսում, որ Հայաստանից դեպի Ռուսաստան արտահանման ծավալները կաճեն, փոխնախարարը հայտնեց, որ «ԵՏՄ-ին անդամակցության գնահատման աշխատանքների մեջ նման մտադրութոյւն չկա, որ անպայման արտահանման աճ տեղի ունենա»:

Լուսանկարը՝ Armenpress-ի