Փաստ ինֆո

Դատապարտյալներին արգելված իրեր հանձնելու դիմաց կաշառ ստանալու մեջ մեղադրվող, «Վանաձոր» քրեակատարողական հիմնարկի անվտանգության ապահովման բաժնի կրտսեր մասնագետ Վարդան Ծատուրյանն առաջադրված մեղադրանքում իրեն մեղավոր է ճանաչել: Այդ մասին «Փաստինֆո»-ի թղթակցի հետ զրույցում ասաց Վարդան Ծատուրյանի պաշտպան Գայանե Գալոյանը:

Պաշտպանը նշեց, որ գործով մյուս ամբաստանյալը՝ նույն  քրեակատարողական հիմնարկի պահպանության ապահովման բաժնի աշխատակից Մասիս Մարտիրոսյանը, դեռևս դիրքորոշում չի հայտնել և չի բացառվում, որ մեղադրանքն ընդունելուց հետո գործը քննվի արագացված դատաքննության կարգով:

Ըստ մեղադրանքի՝ Վարդան Ծատուրյանը կաշառք տվողի ներկայացրած անձանց օգտին ակնհայտ ապօրինի գործողություն կատարելու, այն է՝ արգելված իր հանդիսացող բջջային հեռախոսները հիշյալ հիմնարկի դատապարտյալներին փոխանցելու համար 2014թ. մարտի 31-ին` ժամը 21:00-ի սահմաններում, Վանաձոր քաղաքում միջնորդի՝ նույն քրեակատարողական հիմնարկի պահպանության ապահովման բաժնի 3-րդ կարգի մասնագետ Մասիս Մարտիրոսյանի միջոցով ստացել է գործով չպարզված անձի կողմից իրեն փոխանցված 40.000 ՀՀ դրամ կաշառք, ինչպես նաև՝ կպչուն ժապավենով փաթեթավորված հինգ բջջային հեռախոս ու կից պարագաներ:

Վարդան Ծատուրյանը նշված գումարը պահել է իր բնակարանում, իսկ բջջային հեռախոսներով և կից պարագաներով փաթեթը հաջորդ օրը, նախապես թաքցնելով համազգեստի բաճկոնի տակ, իր հետ մտցրել է «Վանաձոր» ՔԿՀ տարածք, սակայն չի հասցրել դրանք փոխանցել հիմնարկի դատապարտյալներին, քանի որ նույն հիմնարկի աշխատակիցների կողմից անձնական զննությամբ նրա մոտից առգրավվել են այդ բջջային հեռախոսները և կից պարագաները, իսկ 40.000 ՀՀ դրամը, որը թաքցրել էր իր բնակարանում, նա ինքնակամ ներկայացրել է քննությանը:

Վարդան Ծատուրյանին մեղադրանք է առաջադրվել ՀՀ քրեական օրենսգրքի 311-րդ հոդվածի 2-րդ մասով, իսկ նույն քրեակատարողական հիմնարկի պահպանության ապահովման բաժնի աշխատակից Մասիս Մարտիրոսյանին մեղադրանք է առաջադրվել ՀՀ քրեական օրենսգրքի 313-րդ հոդվածի 2-րդ մասով:

Նրանց երկուսի նկատմամբ որպես խափանման միջոց է ընտրվել չհեռանալու մասին ստորագրությունը: