Փաստ ինֆո

Տանտիրուհուն  դաժան ծեծի ենթարկելու գործը Վերաքննիչ դատարանը բեկանել է  եւ ուղարկել նոր կազմով քննության:

Ինչպես «Փաստինֆո»-ն ավելի վաղ տեղեկացրել էր, մեղադրանքի համաձայն, Կարեն Ավետիսյանը  2013թ. հուլիսի 22-ին՝ ժամը 13:00-ի սահմաններում,  մալուխով, ինչպես նաև ոտքերով, դիտավորությամբ առանձին դաժանությամբ հարվածել է Ռուզաննա Էլոյանի մարմնի տարբեր մասերին` հենց վերջինիս բնակարանում: 

Կարեն Ավետիսյանը փողոցում զուգարանի կարիք է ունեցել և գնացել տուժող Ռուզաննա Էլոյանի բնակարան: Կինը նրան ներս է հրավիրել, սուրճ հյուրասիրել եւ Կարենն էլ, օգտվելով առիթից, հոգացել է նաեւ բնական կարիքները: Ռուզաննայի տանը գտնվելու ընթացքում նրանք զրուցել են նաեւ տարբեր թեմաներից` ընդհուպ մինչև Եհովայի վկաների մասին, դիտել նրանց վերաբերյալ լազերային սկավառակ, քանի որ տուժողը նույնպես Եհովայի վկա է եղել:

Տուժողի տանը շուրջ երկուսուկես ժամ գտնվելուց հետո  ամբաստանյալը, վրդովված լինելով Հայ Առաքելական Եկեղեցու մասին տուժողի մեկնաբանություններից, վեր է կացել, անսպասելի շրջվել դեպի  Ռ. Էլոյանի թիկունքը, գրպանից հանել մշտապես իր մոտ գտնվող` աշխատանքների ընթացքում օգտագործվող մալուխը եւ այն գցել տուժողի պարանոցին, ապա ուժգին հրելով նրան գցել հատակին:  Տուժող Ռ. Էլոյանը բարձրաձայն բղավել է, իսկ նրա ձայնը կտրելու նպատակով Կ. Ավետիսյանը ձեռքերով և ոտքերով, առանձին դաժանությամբ բազմաթիվ հարվածներ է հասցրել նրա գլխին, սակայն, տեսնելով, որ վերջինս ձայնը չի կտրում, գնացել է խոհանոց, այնտեղից վերցրել դանակ` Ռ. Էլոյանին վախեցնելու համար:  Դանակի բռնակով հասցված հարվածներից հետո Կ. Ավետիսյանը դիմել է փախուստի:

Արդյունքում`  տուժողին պատճառվել են գոտկային 4-րդ ողի փակ կոմպրեսիոն կոտրվածք, պարանոցի շրջանի, զույգ հոնքերի դրսային մակերեսների, աջ բազկի կողմնային մակերեսի, աջ ոտնաթաթի թիկնային կողմնային արյունազեղումներ և արյունահավաքներ: Նշված վնասվածքները փորձագետները գնահատել են որպես միջին ծանրության վնաս:

Կարեն Ավետիսյանին մեղադրանք  է  առաջադրվել ՀՀ քրեական օրենսգրքի  113-րդ հոդվածի երկրորդ մասի  5-րդ կետով՝  առանձին դաժանությամբ դիտավորությամբ առողջությանը միջին ծանրության վնաս պատճառելը: Նրա նկատմամբ խափանման միջոց է ընտրվել չհեռանալու ստորագրությունը:

Դատարանը ամբաստանյալի պատասխանատվությունը և պատիժը մեղմացնող հանգամանք է դիտել այն, որ նա  նախկինում դատված չի եղել, բնութագրվում է դրական, խնամքին են գտնվում մինչև տասնչորս տարեկան երկու երեխաները, տվել է խոստովանական ցուցմունքներ` անկեղծորեն զղջացել է կատարածի համար, մեղայականով ներկայացել է նախաքննության մարմնին և,  բացի այդ, տուժողին պատճառված վնասը մասամբ վերականգնել է:

Առաջին ատյանի դատարանի դատավճռով Կարեն Ավետիսյանը դատապարտվել է 3 տարի ժամկետով ազատազրկման, սակայն  պատիժը պայմանականորեն չի կիրառվել և  սահմանել է փորձաշրջան՝ 1 տարի 6 ամիս ժամկետով:

Մեղադրանքը պաշտպանող  դատախազին չի գոհացրել նշանակված պատիժը, և նա բողոք է ներկայացել Վերաքննիչ դատարան պահանջով՝ մասնակիորեն բեկանել և փոփոխել Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանի դատավճիռը և Կարեն Ավետիսյանի նկատմամբ ՀՀ քրեական օրենսգրքի 113-րդ հոդվածի 2-րդ մասի 5-րդ կետի սանկցիայի շրջանակներում նշանակել համաչափ պատիժ` առանց ՀՀ քրեական օրենսգրքի 70-րդ  հոդվածի կիրառման:

Վերաքննիչ դատարանը մասնակիորեն բավարարել է մեղադրողի բողոքն ամբաստանյալին առաջադրված մեղադրանքի մասով, բեկանել և ուղարկել նույն դատարան, այլ կազմով` նոր քննության:

Գործը գտնվում է Շենգավիթ վարչական շրջանի ընդհանուր իրավասության  դատարանի դատավոր Ալեքսանդր Ազարյանի վարույթում: