Փաստ ինֆո

ՀՀ դատական դեպարտամենտի նախկին ղեկավար Միսակ Մարտիրոսյանի ու մյուսների գործով այսօրվա դատական նիստում հարցաքննվեց ընդհանուր առմամբ 14 վկա: Բոլորն առնչվում էին  դատական կարգադրիչների կողմից անաշխատ աշխատավարձերի յուրացումների դրվագներին:

Այսպես, վկա  Էլյա Ասլանյանը հայտնեց, որ իրեն ասվել է, որ դիմել է՝ որպես դատական կարգադրիչ աշխատելու համար, սակայն իրեն ասվել է, որ իրեն կադրերի ռեզերվ կտեղափոխեն մինչև «Երևանում տեղ բացվի»: Վկան հստակ նշեց, որ խոսակցությունը եղել է Դատական ծառայության պետի տեղակալի հետ՝ Գրիգորյան ազգանվամբ:

Վկա Կարեն Միքայելյանը դիմել է Շիրակի մարզի դատարանում աշխատելու համար, միայն մեկուկես-երկու տարի անց է իմացել, որ «ընդունվել եմ աշխատանքի»: Փաստացի երկու ամիս է աշխատել. 50  հազար դրամ աշխատավարձով հնարավոր չի եղել հոգալ ընտանիքի կարիքները, ուստի՝ ազատվել է աշխատանքից:

Մի շարք վկաներ այլ աշխատանքի անցնելու կապակցությամբ են իմացել, որ «աշխատում են» դատական կարգադրիչների ծառայությունում:

Այսպես, Արման Կարապետյանը Դատական կարգադրիչների ծառայությունում դիմում գրելուց 5-6 ամիս անց ազատման դիմում է ներկայացրել՝ հարկային մարմնում աշխատանքի ընդունվելու կապակցությամբ: Նախաքննության ընթացքում վկան հայտնել էր, որ «ինչ-որ տեղակալ Գրիգորյանն» ասել է, որ նշանակված է որպես դատական կարգադրիչ, երբ «քաղաք տեղափոխվի, նոր կասեն»:   

Վկա Արման Մկրտչյանը, ով ճանաչեց ամբաստանյալ, Դատական կարգադրիչների ծառայության ղեկավարի առաջին տեղակալ Գեղամ Գրիգորյանին, հայտնեց, որ վերջինս է հայտնել իրեն, որ «ազատ տեղ չկա, ազատ տեղ լինի, կկանչենք»: Ըստ վկայի՝ Գեղամ Գրիգորյանն ասաց, որ «գործս օդի մեջ է մնում»:

Նախաքննության ընթացքում վկան հայտնել էր, որ իրեն ասվել է, որ քանի որ ազատ տեղ չկա, աշխատավարձ չեն տալու, սակայն աշխատանքային ստաժը հոսելու է: «Աշխատանքից» ազատվելու դիմում է ներկայացրել՝ ոստիկանությունում աշխատանքի անցնելու կապակցությամբ:

Վկա Միքայել Այվազյանը ևս դիմում է ներկայացրել՝ որպես դատական կարգադրիչ աշխատանքի անցնելու համար, իրեն առաջարկվել է աշխատել Արարատի ու Վայոց Ձորի դատարանում, ինքը հրաժարվել է. իրեն հարմար չի եղել, հեռու էր, աշխատավարձն էլ՝ ցածր: 

Ոստիկանության զորքերում աշխատանքի անցնելու համար աշխատանքային գրքույկն էր պետք, որը մնացել էր Դատական կարգադրիչների ծառայությունում, ուստի՝ «ահագին ժամանակ անց» ազատման դիմում է ներկայացրել: Դատարանում վկան անուններ չէր նշում, սակայն նախաքննության ընթացքում նշել էր, որ աշխատանքի շուրջ խոսակցությունը տեղի է ունեցել Գեղամ անունով անձի հետ:

Վարազդատ Ասիկյանը, ով աշխատել է որպես Դատական դեպարտամենտի ղեկավարի տեղակալի վարորդ, հայտնեց, որ խնդրել է աշխատանքի տեղավորել իր ընկերոջ որդուն: Դիմումը ներկայացրել է Գեղամ Գրիգորյանին՝ այլ անձանց ներկայությամբ: Ըստ վկայի՝ իրեն ասել է, որ երկրորդ դիմումն էլ՝ ազատման, ներկայացնեն, նույն օրը ներկայացրել են նաև աշխատանքից ազատվելու դիմում:

Վկա Ռաֆայել Սաֆարյանին առաջարկել են աշխատել Աբովյանի դատարանում, իրեն հարմար չի եղել, հրաժարվել է: Դատավարության մասնակիցների այն հարցին, թե աշխատավարձի քարտ ու աշխատավարձ ստացե՞լ եք, վկան փաստեց՝ «Ոչ, ոչ մի բան չեմ արել»:

Վկա Հայկ Խուդոյանը հայտնեց, որ երկու ամիս փաստացի աշխատել է ու աշխատավարձ ստացել: Նրա նախաքննական ցուցմունքից պարզ դարձավ, որ նա հրամանագրվել է որպես դատական կարգադրիչ 2012թ. փետրվարի  1-ից, սակայն միայն  2013թ. հուլիսին են իրեն զանգել ու հայտնել, որ «հրամանը եղել է»:

Ամբաստանյալ, Երևանի Ավան և Նոր Նորք վարչական շրջանների դատարանի դատական կարգադրիչների ստորաբաժանման ղեկավար Բագրատ Արիկյանցի դուստրն այսօր հրաժարվեց ցուցմունք տալ՝ օգտվելով մերձավոր հարազատի դեմ ցուցմունք չտալու՝ իր սահմանադրական իրավունքից:

Նախաքննության ընթացքում լրացուցիչ ցուցմունքում նա հայտնել էր, որ հայրն իրենից անձնագրի ու սոցքարտի պատճեն է խնդրել:

Հետագայում պարզվել է, որ ձևակերպված է եղել որպես դատական կարգադրիչ, չի աշխատել, աշխատավարձի պլաստիկ քարտ չի ունեցել, աշխատավարձ չի ստացել: