Փաստ ինֆո

«Հայկական Ժամանակ» օրաթերթի խմբագրություն է ահազանգել շորթում կազմակերպելու մեղադրանքով ձերբակալված Դոգ մականունով նախկին ոստիկան Վարդան Ղուկասյանի մայրը:

Նա լրատվամիջոցին հայտնել է, որ որդուն ձերբակալելուց հետո գնացել է ոստիկանություն, սակայն նրան նստեցրել են ավտոմեքենա, տարել Նուբարաշեն ու հեռացել:

Ըստ տիկնոջ՝ իրեն ոտքից ու ձեռքից բռնել ու շպրտել են ավտոմեքենա, տարել են Նուբարաշեն, ինչպես ինքն է ասում, շպրտել մեքենայից դուրս ու հեռացել: Նրա ասելով՝ ձեռքերն ամբողջությամբ կապտած են:

Լրատվամիջոցի հարցին, թե հոկտեմբերի 22-ին կինն անձամբ ոստիկանապետի հետ է հանդիպել, արդյոք նրա ներկայությամբ է ոստիկանապետը հրամայել, որ նրան տանեն Նուբարաշեն, տիկին Սուսաննան պատասխանել է. «Ինքն է տվել հրամանը, որ տարեք սրան ոչնչացրեք»:

Այնուհետև Վ.Ղուկասյանի մայրը մանրամասներ է ներկայացրել որդու ձերբակալման հետ կապված: Նա մասնավորապես ասել է, որ մի 20 ոստիկաններ՝ դիմակավորված, հոկտեմբերի 21-ին ներխուժել են իրենց տուն, Վ.Ղուկասյանին ձերբակալել՝ Վ.Գասպարյանի հրամանով, և ամբողջը տարել:

«Չորս հատ բջջային հեռախոս, գումարներ, բանկային քարտեր, համակարգիչ, հիմա ես սոված-ծարավ նստած եմ»:

Այնուհետև կինը պատմել է, որ որդին՝ Վ.Ղուկասյանը, կռվել է Երևանի ոստիկանապետի հետ, որից հետո էլ աշխատանքից ազատման դիմում է գրել:

Ըստ տիկին Սուսաննայի՝ Ա.Կարապետյանը հեռուստացույց է դրել Վ.Ղուկասյանի աշխատասենյակում, որի մեջ եղել է տեսանկարահանող սարք, ինչի մասին տեղյակ չի եղել նախկին ոստիկանը:

Միաժամանակ կինը պատմել է, որ Վ.Ղուկասյանի՝ արձակուրդում լինելու ժամանակ նրա չհրկիզվող պահարանում, իբր, փորձել են ինչ-որ բան դնել, որ հետո բռնեն: Նրա խոսքով՝ Ղուկասյանին  ԱԱԾ-ից կանչել են ու ասել՝ էս դու էս էլ քո կաբինետը, տեսնու՞մ ես, որ հսկողության տակ ես:

Լրատվամիջոցը տիկնոջ պատմածների կապակցությամբ դիմել է ոստիկանության լրատվական ծառայություն, որտեղից, մասնավորապես ոստիկանապետի հետ հանդիպման առնչությամբ, ասել են, որ քաղաքացին չէր կարող հանդիպել ոստիկանապետի հետ:

Հոդվածն ամբողջությամբ կարող եք կարդալ «Հայկական Ժամանակ» օրաթերթի` 24.10.2014թ. համարում: