Փաստ ինֆո

«Հայ ազգային կոնգրես» խմբակցության անդամ Նիկոլ Փաշինյանը, դեմ կքվեարկի կառավարության կողմից ներկայացված «Սահմանամերձ գյուղական համայնքներում իրականացվող գործունեությունը հարկերից ազատելու մասին» օրինագծին, ինչքան էլ փորձ արվի նախագծի շուրջ ձևավորել համաձայնության մթնոլորտ, եթե դրանում փոփոխություններ տեղի չունենան, այսինքն՝ ուղղակի հասցեական օգնութուն չտրվի սահմանապահ համայնքներին:

Այս մասին պատգամավորը հայտնեց վերոհիշյալ օրինագծի և կից մի շարք օրենքներում փոփոխությունների ու լրացումների փաթեթի քննարկման ժամանակ:

Պատգամավորի պարզաբանմամբ՝ ինքը դեմ կքվեարկի, քանի որ կառավարության օրինագիծը չի արտացոլում այն խոստումները, որոնք տրվել են հայ-ադրբեջանական սահմանին օգոստոսյան լարվածության օրերին պատգամավորների և կառավարության ներկայացուցիչների՝ տարածաշրջան կատարած այցերի և բնակչության հետ հանդիպումների ժամանակ: Ըստ նրա՝ նախագծով ընդամենն առաջարկվում է սահմանամերձ համայնքներում գործող կրպակներին, խանութներին ազատել հարկերից, եթե վերջիններս վարեն որոշակի հաշվապահություն, իսկ օրենքով սահմանված բազմաթիվ պայմանները խախտելու դեպքում, ըստ պատգամավորի, «տնով-տեղով տոկոսի տակ կընկնեն, ամեն ինչ կկորցնեն»:  

«Այս օրենքը նշանակում է ամառային հայրենասիրական ուտուշ-խմուշներից, սրտաճմլիկ կենացներից հետո քցել, կոտրել, հերթական անգամ արհամարել սահմանապահ համայնքների բնակիչներին, ովքեր քնում, արթնանում, ապրում ու իրենց երեխաներին դպրոց են ուղարկում ադրբեջանական սնայպերների ուղիղ նշանառության ներքո: Բայց քաղաքական վերնախավի քցելու այս մոտեցումը ինձ համար ամենևին էլ զարմանալի չի, որովհետև այս դահլիճում էլ, կառավարությունում էլ, իշխանական և քաղաքական վերնախավում էլ կան բազմաթիվ մարդիկ, ովքեր ժողովրդին խաբելու, քցելու ավելի քան հարուստ փորձ ունեն: Կներեք, այդ բազմությանը միանալու ցանկություն ամենևին չունեմ»,- հայտարարեց նա:

Ն.Փաշինյանը նկատեց, որ ընդամենը երկու շաբաթ առաջ ՀՀԿ խմբակցության պատգամավորների ճնշող մեծամասնության և ԲՀԿ պատգամավորների մի մասի ջանքերով արգելափակվեց սահմանապահ համայնքների մասին իր կողմից ավելի վաղ ներկայացրած օրինագծի ընդգրկումը ԱԺ օրակարգ:

Օրինագծով, որը պետական բյուջեի վրա 2,5 մլրդ դրամ էր արժենալու, այսինքն՝ նույնքան, որքան կառավարության օրենսդրական նախաձեռնությունը, բայց, ի տարբերություն վերջինի, նպատակաուղղված էր Ադրբեջանի հետ Հայաստանի սահմանից առավելագույնը երեք կիլոմետր հեռավորության վրա գտնվող համայնքների բնակիչների հոգսերը թեթևացնելուն: Ի թիվս այլ արտոնությունների՝ մասնավորապես առաջարկվում էր ՀՀ պետական բյուջեի միջոցներից փոխհատուցել սպառած բնական գազի, էլեկտրական էներգիայի, խմելու և ոռոգման ջրի ամսական վարձավճարի 50 տոկոսը, նաև ազատել հողի հարկից և անշարժ գույքի գույքահարկից:

ԱԺ նախագահ Գալուստ Սահակյանն ընդդիմադիր պատգամավորի ելույթին արձագանքեց, թե «որևէ գաղափար չի մեռնում», ապա կարծիք հայտնեց, որ «կգա ժամանակը՝ այդ հարցն էլ կքննարկվի»: