Փաստ ինֆո

Կառավարության շենքի դիմաց այսօր հավաքվել էին մի քանի տասնյակ ապագա մայրեր, ովքեր եկել էին իրենց դժգոհությունը հայտնելու կառավարության օրենսդրական վերջին նախաձեռնության դեմ, որով իշխանությունները մտադիր են կրճատել աշխատող մայրերին հղիության ու հետծննդյան արձակուրդի ընթացքում տրվող նպաստների չափը:

Հղի կանայք կառավարությունից պահանջում էին դադարեցնել «փայ մտնելու» քաղաքականությունը և իրենց ապագա երեխաներից չվերցնել ծնողի արդար աշխատանքով վաստակած միջոցները:

Բանն այն է, որ կառավարության հաստատած այս նախագծով նախատեսվում է մեկ տարուց պակաս աշխատող մորը երեխայի ծննդյան արձակուրդի ընթացքում տրամադրել իր միջին աշխատավարձի 40 տոկոսը, 1-3 տարի նույն հիմնարկում աշխատանքային ստաժի դեպքում՝ 60 տոկոսը, իսկ 3 և ավելի տարիների ստաժի դեպքում՝ 80 տոկոսը: Փոխարենը այս կանանց չվճարված գումարները կառավարությունը մտադիր է հատկացնել չաշխատող մայրերին: Ինչպես հղիներն էին այսօր ասում` իրենց փողերով մյուսներին լավություն անելու տարբերակով:

Այն պահին, երբ հղի կանայք կառավարության շենքի դիմաց սոցիալական արդարություն էին պահանջում, ՀՀ սոցիալական ապահովության հարցերի նախարար Արտեմ Ասատրյանը կառավարության մամուլի սրահում լրագրողներին էր ներկայացնում օրենսդրական այս նախաձեռնության հիմնավորումները: Նախարարի խոսքով՝ կառավարությունն առաջնորդվել է հենց սոցիալական արդարությունը վերականգնելու ցանկությամբ, քանզի այս փոփոխությունը թույլ կտա վճարել նաև չաշխատող մայրերին: Դե իսկ քանի որ բյուջեում բավարար միջոցներ չկան, դա անում է աշխատող մայրերի հաշվին:

Կառավարության բակում հավաքված ապագա մայրերն իհարկե այս կարծիքը չեն կիսում, ավելին` մատնանշում էին, թե ցանկության դեպքում որտեղ կարելի է գտնել անհրաժեշտ գումարները:

«Մենք երկու օրինակ ենք բերել մեր նամակում. Ս.թ. մայիսի 22-ին ՀՀ ԱԺ-ն հավանություն տվեց «Ակցիզային հարկի մասին ՀՀ օրենքում փոփոխություններ կատարելու մասին» ՀՀ կառավարության ներկայացրած օրենքի նախագծին, որով ՀՀ ներկրվող թանկարժեք ավտոմեքենաները ազատվեցին 20 % ակցիզային հարկից, 2010 թվականից ի վեր ՀՀ ԱԺ-ում շրջանառության մեջ է դրվել «Շքեղության հարկի մասին» ՀՀ օրենքի նախագիծը, որն այդպես էլ չի ընդգրկվել ԱԺ օրակարգ: Այսինքն, մենք ասում ենք, որ կան այլ լծակներ ու մեխանիզմներ, որոնք կարող են օգտագործվել չաշխատող կանանց մայրության նպաստը հոգալու համար»,- նեկայացնելով ՀՀ վարչապետին հասցեագրված նամակի բովանդակության մի հատվածը՝ նշեց «Ժամանակավորապես անաշխատունակ ճանաչված անձանց իրավունքների պաշտպանության հասարակական նախաձեռնության անդամներից մեկը:

Իսկ սոցապ նախարարն այդ պահին կառավարության շենքի ներսում վիճակագրական որոշ տվյալներ էր հրապարակում լրատվամիջոցների ներկայացուցիչներին` ներկայացնելով նպաստի այս տեսակի գրանցած թռիչքային աճը:

«Այս նպաստների համար պետական բյուջեով նախատեսված ծախսերն ավելացել են շուրջ 3 անգամ»,- նշեց Արտեմ Ասատրյանն ու հավելեց. «2014թ. համար նախատեսված 8.5 մլրդ-ից հասնելով 12 մլրդ դրամի: Նախատեսվում է, որ տարին կամփոփվի 12 մլրդ դրամով»:

Սոցապ նախարարը հիշեցրեց, որ նույն կերպ ժամանակավոր անաշխատունակության նպաստ են ստանում ոչ միայն հղի կանայք, այլև, ասենք, ինչ-որ հիվանդության պատճառով որոշ ժամանակ աշխատանքի չգնացող մյուս բոլոր աշխատողները: Եվ կառավարության ուսումնասիրությունները ցույց են տալիս, որ ծնվող երեխաների թիվը չի աճում, հիվանդացության աճ ևս չկա: Փոխարենը աճել են դեպքերը, երբ հղիության արձակուրդ են գնում վերջին 1-2 ամսվա ընթացքում աշխատանքի ընդունված կանայք: «Եվ ստացվում է, որ այն գումարները, որոնք նախատեսված են պետական բյուջեով այդ ծրագրերի իրականացման համար, չեն բավարարում»,- ասաց նախարարը:

Նախարարը նաև տեղեկացրեց, որ օրինագիծը դեռևս վերջնական տեսքի չի բերվել, իրենք պատրաստ են քննարկել բոլոր շահագրգիռ կողմերի հետ, և որ երկուշաբթի օրն այս հարցի շուրջ խորհրդարանական լսումներ են նախանշված, որոնց արդյունքում ձևավորված վերջնական նախագիծն էլ  կներկայացվի ԱԺ-ի քննարկմանը:

Ասուլիսի ավարտին լրագրողները նախարարին տեղեկացրեցին, որ կառավարության շենքի դիմաց հավաքված են հղի կանայք և հետաքրքրվեցին, արդյոք նախարարը դուրս կգա շենքից ու նրանց հետ կքննարկի խնդիրը: Արտեմ Ասատրյանը հայտնեց, որ նրանց հետ կհանդիպի իր մամուլի քարտուղարն ու հետո իրեն կփոխանցի նրանցից ստացած նամակը: Դրանից հետո նախարարը շտապեց կառավարության շենքից հեռանալ հետնամուտքով` խուսափելով հղի կանանց հետ հանդիպելուց:

Հղիներն էլ իրենց նամակը վարչապետին հանձնեցին նամակների և դիմումների բաժնի պետ Ալեքսանդր Ղազարյանի ձեռամբ: