Փաստ ինֆո

Դեռ 17 տարին չբոլորած անչափահաս տղան այսօր դատապարտվեց երեք տարվա ազատազրկման:

Արագացված դատաքննության կարգով քննված գործի դատավճռով նա մեղավոր ճանաչվեց ՀՀ քրեական օրենսգրքի 112-րդ հոդվածի  1-ին մասով՝ դիտավորությամբ առողջությանը ծանր վնաս պատճառելը՝ ծակված-կտրված թափանցող վերքի ձևով հորեղբոր որդու  առողջությանը ծանր, կյանքին վտանգ սպառնացող վնաս պատճառելու համար: «Ծնողի հսկողությանը հանձնելը» խափանման միջոցը կմնա ուժի մեջ՝ մինչև դատավճռի՝ օրինական ուժի մեջ մտնելը:

Ըստ մեղադրանքի՝ նա 21.05.2014-ին՝ ժամը 17։00-ից մինչև 18։00-ն ընկած ժամանակահատվածում, կենցաղային հարցերի շուրջ վիճաբանության մեջ է մտել իր ազգականի հետ և իր մոտ եղած դանակով դիտավորությամբ հարվածել է վերջինիս կրծքավանդակի հետին մակերեսին:

Անչափահասի պաշտպան, փաստաբան Հայկ Հակոբյանն ի պատասխան ազատազրկման տեսքով պատիժ նշանակելու՝ մեղադրողի միջնորդության՝ պաշտպանական ճառում միջնորդել էր անչափահասին նշանակվելիք պատիժը պայմանականորեն չկիրառել: 

Իսկ եթե դատարանը դատավճիռ կայացնելիս գա եզրակացության, որ անչափահասը կարող է ուղղվել առանց քրեական պատժի միջոցներ կիրառելու, պաշտպանը խնդրել է անչափահասին ազատել պատժից և նրա նկատմամբ կիրառել դաստիարակչական բնույթի հարկադրանքի միջոցներ կամ Քրեական օրենսգրքի համապատասխան հոդվածներով նախատեսված ավելի մեղմ պատիժ:

Պաշտպանը խնդրել էր դատարանին հաշվի առնել, որ տուժողն ու ամբաստանյալը հաշտվել են, հաշվի առնել տուժողի ու նրա հոր, վերջինս գործով վկա է, հակաօրինական ու հակաբարոյական գործողությունները, ինչպես նաև այն, որ ամբաստանյալն ընդունել է մեղադրանքն ու միջնորդել գործը քննել արագացված դատաքննության կարգով:

Ըստ պաշտպանի՝ թեև մեղադրողն անդրադարձել է պատիժը մեղմացնող հանգամանքներին, սակայն անտեսել է ՀՀ քրեական օրենսգրքի 10-րդ և 70-րդ հոդվածների պահանջները՝ Արդարության և պատասխանատվության անհատականացման սկզբունքը և Պատիժը պայմանականորեն չկիրառելը:

«Վստահեցնում եմ, որ անչափահասի ուղղվելը հնարավոր է առանց պատիժը կրելու»,- նշել էր պաշտպանը:

Հայկ Հակոբյանը «Փաստինֆո»-ի թղթակցին հայտնեց, որ բողոքարկելու է դատավճիռը Վերաքննիչ դատարան: