Փաստ ինֆո

ՀՀ կառավարության այսօրվա նիստի ավարտին, բավական ուշագրավ հայտարարություն արեց վարչապետ Հովիկ Աբրահամյանը` կառավարության անդամներին կոչ անելով մարզային տարածքային կառույցների ղեկավարներ նշանակելիս հաշվի նստել տվյալ մարզը ղեկավարող մարզպետի հետ:

«Ես ուզում եմ բոլորիդ խնդրել, հորդորել, որ մարզպետների հետ շատ ակտիվ համագործակցություն ձևավորեք, դա շատ կարևոր է, և մարզպետը հանրապետության նախագահի, կառավարության, վարչապետի ներկայացուցիչն է մարզերում, ինչու չէ` նաև յուրաքանչյուր նախարարի»,- ասաց Հովիկ Աբրահամյանն ու հավելեց. «և կարծում եմ՝ այստեղ մենք մեր համագործակցությունը պետք է ավելի սերտացնենք»:

Հովիկ Աբրահամյանը նախարարներին կոչ արեց մարզերում նշանակումներ կատարելիս պահպանել ՀՀ նախագահի՝ 06.05.1997թ. «Հայաստանի Հանրապետության մարզերում պետական կառավարման մասին» հրամանագրի 1.25 կետը»:

Նշենք, որ հիշյալ դրույթը վերաբերում է հենց մարզային կառույցներում ղեկավարների նշանակման հարցում մարզպետների կարծիքները հաշվի առնելուն:

«Հանրապետական գործադիր մարմնի ղեկավարը համապատասխան տարածքային ծառայության ղեկավարի պաշտոնի նշանակման և ազատման մասին եռօրյա ժամկետում տեղեկացնում է մարզպետին:

Մարզպետը կարող է համապատասխան հանրապետական գործադիր մարմնին գրավոր, փաստարկված առաջարկություն ներկայացնել` վերջինիս տարածքային ծառայության գործունեության, ինչպես նաև ղեկավարի զբաղեցրած պաշտոնին անհամապատասխանության վերաբերյալ նրա նշանակվելուց վեց ամիս հետո:

Հանրապետական գործադիր մարմինը պարտադիր քննության է առնում մարզպետի առաջարկությունը և մեկամսյա ժամկետում մարզպետին տեղեկացնում արդյունքների մասին»,- ասված է Հովիկ Աբրահամյանի վկայակոչած հրամանագրում:

Ի դեպ, նույն հրամանագրի համաձայն՝ եթե մարզպետն այնուամենայնիվ չի հաշտվում տարածքային որևէ կառույցի ղեկավարի պաշտոնում կատարված նշանակման հետ, նա կարող է դիմել ՀՀ  վարչապետին: Եվ այս դեպքում վարչապետի որոշումը, հրամանագրի համաձայն, արդեն վերջնական է: