Փաստ ինֆո

Ազգային ժողովի քննարկմանը կառավարության կողմից ներկայացված «Սահմանամերձ գյուղական համայնքներում իրականացվող գործունեությունը հարկերից ազատելու մասին» և կից մի շարք օրենքներում փոփոխությունների ու լրացումների փաթեթն ամբողջության մեջ, «որպես տնտեսական մտածողության արգասիք, կապ ունեցող նախաձեռնություններ են, բայց կարգավորման առարկայի անունից իրար հետ այդքան էլ կապ չունեն»: Այս մասին ԱԺ այսօրվա նիստում՝ օրենսդրական փաթեթի առաջին ընթերցմամբ քննարկման ժամանակ, հայտարարեց ՀՀԿ խմբակցության անդամ Սամվել Ֆարմանյանը:

Նա, մասնավորապես, մատնանշեց փաթեթում ներառված եկամտային հարկի մասին օրենքում լրացումը, ըստ որի՝ մասնավորապես առաջարկվում է օրենքով սահմանված կարգով վճարված եկամտային հարկը հետ վերադարձնել ՀՀ տարածքում կառուցված կամ կառուցվող բազմաբնակարան բնակելի շենքում անմիջապես կառուցապատողից, ինչպես՝ նաև պետության և (կամ) համայնքի կողմից իրականացվող բնակարանային ապահովության ծրագրի շրջանակներում պետությունից կամ համայնքից բնակարանի ձեռք բերման նպատակով վարձու աշխատողի, անհատ ձեռնարկատիրոջ և նոտարի կողմից ստացված և փաստացի բնակարանի ձեռք բերմանն ուղղված հիպոթեքային վարկի սպասարկման համար վճարվող տոկոսների գումարների չափով:

Ս.Ֆարմանյանն ընդգծեց, որ որոշ մտահոգություններ այստեղ տեսնում է. «Եթե շատ անկեղծ լինեմ, ապա նախագիծն ընթերցելուց հետո իմ մոտ ստեղծվում է տպավորություն, որ Երևանում կան կառուցված բազմաբնակարան շենքեր, այդ շենքերի բնակարաններն իրացնելու համար անհրաժեշտ է նման օրենսդրական փոփոխություն անել, որպեսզի այդ տները վաճառվեն:

Հակառակ պարագայում՝ որևէ փաստարկ չկա հիմնավորելու հակառակը, թե ինչու եկամտային հարկից նման արտոնություններ տրամադրել միայն բազմաբնակարան շենքերից կամ հիմնական կառուցապատողից գնողներին: Ենթադրենք՝ մարդն ապրում է Շիրակի մարզի իքս գյուղական համայնքում, վճարում է եկամտահարկ և ցանկանում է իր համար սեփական տուն կառուցել: Հիմա ինչպե՞ս ենք այդ մարդուն ասելու, որ ո՛չ, դու եկամտահարկը պետք է վճարես, բայց Երևանում ապրող Սամվել Ֆարմանյանին, որը նորակառույց շենքից ցանկանում է բնակարան գնել, պետք է եկամտահարկը հետ վերադարձնենք»:

ՀՀԿ խմբակցության պատգամավորը կոչ արեց կառավարությանը՝ վերանայել այս խտրական մոտեցումը, նաև հավելեց, որ օրենքով օգտագործվող բազմաբնակարան շենքերի ձևակերպումները «էկվիվալենտ են Երևանում կառուցված բազմաբնակարանների հետ»:

Ս.Ֆարմանյանը հայտարարեց, որ միանում է քննարկման ժամանակ այլ պատգամավորների կողմից հնչեցրած առաջարկներին և առաջարկում է գոնե մինչև երկրորդ ընթերցում առանձնացնել փաթեթում ներառված օրինագծերը և վերանայել իր մատնանշած օրինագծի ձևակերպումները:

Ի դեպ, հարակից զեկուցող, ԱԺ տնտեսական հարցերի մշտական հանձնաժողովի նախագահ, ՀՀԿ խմբակցության անդամ Վարդան Այվազյանը, պատասխանելով պատգամավորների հարցերին, ավելի վաղ վստահեցրել էր, որ խմբակցությունը կառավարությանն առաջարկելու է մինչև երկրորդ ընթերցում փաթեթից առանձնացնել սահմանամերձ համայնքներին անմիջականորեն վերաբերող օրինագծերը:

Լուսանկարը՝ Armenpress-ի