Փաստ ինֆո

«Իրականությանը չի համապատասխանում, ինձ հետ ոչ մի կապ չունի»,- «Փաստինֆո»-ի հետ զրույցում պատասխանելով իր դեմ անցած գիշեր կատարված մահափորձի մասին հարցին՝ ասաց բժշկական համալսարանի նախկին ռեկտոր Վիլեն Հակոբյանը և հավելեց. «Դա ոչ թե իմ բնակարանի, այլ դիմացի բնակարանին է եղել, էն էլ ես չգիտեմ դա իրոք ռումբ է եղե՞լ, թե՝ խաղալիք, որ երեխաները խաղացել են»:

Վիլեն Հակոբյանին հայտնեցինք, որ ՀՀ ոստիկանությունն արդեն պաշտոնապես հայտարարել է, որ երեկ` ժամը 22: 20-ին, Օրբելի Եղբայրների փողոցի 33 շենքի 28 բնակարանի պատշգամբի դռան բռնակից կախված կոշիկի մեջ հայտնաբերվածը իրոք «Ֆ-1» տիպի նռնակ և պայթուցիչ է եղել, որը սակրավորի կողմից վնասազերծվել է:

Մեր այս դիտարկմանը նախկին ռեկտորն այպես արձագանքեց. «Ոստիկանությունը հայտնել է, չի հայտնել, ես չգիտեմ, նրանք բոլորը սիրում են էքստրաօրդինար բաներ հրապարակել: Ես կարծում եմ, ոչ թե կարծում եմ, համոզված եմ, որ եթե իսկական ռումբ էլ լինի, դա ինձ հետ ոչ մի կապ չունի, ոչ մի կապ»,- հայտարարեց մեր զրուցակիցը:

Վիլեն Հակոբյանից ճշտեցինք նաև` արդյոք Օրբելի 33 շենքի 28 բնակարանն իրե՞ն է պատկանում: Նա հաստատեց փաստը, բայց և ավելացրեց. «28 բնակարանը իմն է, բայց 28 բնակարանի դիմացինն է եղել, հասկանում եք»:

«Ես իմ կնոջ հետ եմ ապրում: Եթե ես հանցագործ լինեի, ինձ հետ կապված կլիներ, ոչ թե իմ կնոջ հետ»,- ասաց մեր զրուցակիցն ու հավելեց. «Ես ամեն օր՝ ժամը 6:30 րոպեին, տնից դուրս եմ գալիս, գնում եմ ֆիզկուլտուրա անելու: Հետևողները կիմանային, որ ես համարյա ամեն օր` շաբաթվա 4 օրը դուրս եմ գալիս, նրանք իմ հարցերը կլուծեին»: