Փաստ ինֆո

Ազգային ժողովի պատգամավորներ Ռուբիկ Հակոբյանն ու Թևան Պողոսյանը հանդես են եկել օրենսդրական նախաձեռնությամբ, որով առաջարկում են հանել պարտադիր զինվորական ծառայության զորակոչից ուսումը շարունակելու համար տարկետում ստանալու իրավունքը:

Դրա համար պատգամավորները համապատասխան փոփոխություններ են առաջարկում «Զինապարտության մասին» և «Բարձրագույն և հետբուհական մասնագիտական կրթության մասին» ՀՀ օրենքներում:

Իրենց նախաձեռնությունը հեղինակները մեկնաբանում են նրանով, որ «բարձրագույն կրթություն ստանալ, իսկ այնուհետեւ գիտությամբ զբաղվել ցանկացողների համար իրապես կապահովվի հավասար մեկնարկային հնարավորություն»:

«Գաղտնիք չէ, որ մեզանում առկա է մի տենդենց, ըստ որի՝ Հայաստանի Հանրապետության՝ արական սեռի բազմաթիվ քաղաքացիներ, ցանկանալով խուսափել պարտադիր զինվորական ծառայությունից, ընդունվում են բարձրագույն ուսումնական հաստատություններ, շատ հաճախ՝ նույնիսկ չկարեւորելով մասնագիտական կողմնորոշումը: Բակալավրիատից հետո նրանք շարունակում են իրենց ուսումը սկզբում մագիստրատուրայում, այնուհետեւ՝ ասպիրանտուրայում, որն ավարտելուց եւ թեկնածուական ատենախոսությունը պաշտպանելուց հետո շատ հաճախ չեն զբաղվում գիտական գործունեությամբ:

Դրանով նման մարդիկ խոչընդոտում են այն ուսանողներին, ովքեր իրապես ցանկանում են զբաղվել գիտությամբ եւ իրենց նպաստը բերել հասարակական զարգացման ամենատարբեր ոլորտներին, ընդհանուր առմամբ՝ Հայաստանի Հանրապետությանը»,- հիմնավորելով իրենց առաջարկը՝ գրում են նախագծի հեղինակները և հավելում. «Կարծում ենք, որ արական սեռի այն քաղաքացիները, ովքեր իսկապես ցանկանում են ստանալ բարձագույն կրթություն, իսկ հետո նաեւ զբաղվել գիտական գործունեությամբ, դա նրանք կարող են անել պարտադիր զինվորական ծառայություն անցնելուց հետո եւս»:

«Զինապարտության մասին» և «Բարձրագույն և հետբուհական մասնագիտական կրթության մասին» ՀՀ օրենքներում փոփոխություններ կատարելու մասին նախագիծն արդեն իսկ ընդգրկվել է կառավարության առաջիկա` հոկտեմբերի 23-ի օրակարգում:

Ինչ վերաբերում է կառավարության դիրքորոշմանը, ապա դատելով նախագծի վերաբերյալ արձագանքից՝ գործադիրը դեմ չէ Ռուբիկ Հակոբյանի ու Թևան Պողոսյանի առաջարկին: ՀՀ վարչապետ Հովիկ Աբրահամյանի՝ ԱԺ նախագահ Գալուստ Սահակյանին հասցեագրված նամակի բովանդակությունը թույլ է տալիս ենթադրել, որ կառավարությունը կհաստատի նախագիծն ու այն կուղարկի ԱԺ քննարկմանը:

Հովիկ Աբրահամյանը գրում է. «Հարցն  ունի հասարակական մեծ հնչեղություն, առնչվում է հասարակության լայն շերտերին, դրա շուրջ տարբեր ժամանակներում բուռն քննարկումներ եղել են Հայաստանի խորհրդարանում: Կարծում ենք, որ հարցի վերաբերյալ վերջնական եզրակացության ձևավորման համար անհրաժեշտ է կազմակերպել քաղաքական ուժերի և քաղաքացիական հասարակության ներկայացուցիչների մասնակցությամբ լայն քննարկումներ, ինչն էլ թույլ կտա ոչ միայն վեր հանել հարցադրումները, ներկայացնել ու լուսաբանել մոտեցումները, այլև կնպաստի կշռադատված, հանրորեն ընկալելի ու հիմնավորված որոշման ընդունմանը»:

Նշենք, որ նախագծին կցված եզրակացություններում, գերատեսչություններից ոչ մեկը նախագծի վերաբերյալ բացասական կարծիք չի հայտնել: